ریوا: وزیر اعظم نریندر مودی آج مدھیہ پردیش کے ریوا کے ایک روزہ دورے پر ہوں گے۔ وہ یہاں قومی پنچایتی راج دن کے پروگرام میں حصہ لے کر ملک کی تمام گرام سبھا اور پنچایتی راج اداروں سے خطاب کریں گے۔ وزیراعظم کے دورے کے لیے سیکیورٹی کے خاطر خواہ انتظامات کیے گئے ہیں۔ وزیراعظم یہاں تقریباً 17,000 کروڑ روپے کے منصوبوں کا سنگ بنیاد رکھیں گے اور انہیں قوم کے نام وقف کریں گے۔ تقریب کے دوران وزیر اعظم پنچایت سطح پر سرکاری خریداری کے لیے ایک مربوط ای گرام سوراج اور جی ای ایم پورٹل کا افتتاح کریں گے۔ ای گرام سوراج – گورنمنٹ ای مارکیٹ پلیس انضمام کا مقصد پنچایتوں کو ای گرام سوراج پلیٹ فارم کا فائدہ اٹھاتے ہوئے جی ای ایم کے ذریعے اپنے سامان اور خدمات کی خریداری کے قابل بنانا ہے۔
حکومت کی اسکیموں کو یقینی بنانے کے لیے لوگوں کی شرکت کو آگے بڑھانے کے مقصد کے ساتھ وزیر اعظم ایک مہم کی نقاب کشائی کریں گے۔ مہم کا موضوع جامع ترقی ہوگا، جس میں آخری میل تک پہنچنے پر توجہ مرکوز کی جائے گی۔ وزیر اعظم تقریباً 35 لاکھ سوامتوا پراپرٹی کارڈس مستفیدین کو دیں گے۔ اس پروگرام کے بعد، ملک میں سوامتوا اسکیم کے تحت تقریباً 1.25 کروڑ پراپرٹی کارڈ تقسیم کیے جاچکے ہوں گے، جن میں یہاں تقسیم کیے گئے کارڈ بھی شامل ہیں۔ ‘سبھی کے لیے گھر’ حاصل کرنے کے وژن کو پورا کرنے کی سمت ایک قدم اٹھاتے ہوئے وزیر اعظم پردھان منتری آواس یوجنا-گرامین کے تحت 4 لاکھ سے زیادہ مستفیدین کے ‘گریہہ پرویش’ پروگرام میں شرکت کریں گے۔
یہ بھی پڑھیں: Modi Visit Kerala پی ایم مودی کا کیرالہ دورہ منسوخ نہیں ہوگا، بی جے پی
وزیراعظم تقریباً 2300 کروڑ روپے سے زیادہ مالیت کے مختلف ریلوے منصوبوں کا سنگ بنیاد رکھیں گے اور قوم کے نام وقف کریں گے۔ جن پروجیکٹوں کو وقف کیا جائے گا ان میں مدھیہ پردیش میں 100 فیصد ریل بجلی کاری کے ساتھ ساتھ مختلف ریلوے لائن کی ڈبلنگ، گیج کنورژن اور برق کاری کے منصوبے شامل ہیں۔ وزیر اعظم گوالیار اسٹیشن کی تعمیر نو اور تزئین کاری کا سنگ بنیاد رکھیں گے۔ وزیر اعظم جل جیون مشن کے تحت تقریباً 7000 کروڑ روپے کے پروجیکٹوں کا سنگ بنیاد بھی رکھیں گے۔
یو این آئی
