ریاست مدھیہ پردیش کے ضلع اندور کے جونی تھانہ علاقے میں واقع بیلیشور مندر میں رام نومی کی پوجا کے دوران مندر کی چھت اچانک گر گئی جس کے باعث 24 سے زائد افراد صحن میں واقع کنویں میں گرگئے۔ جس کے نتیجے میں 13 افراد ہلاک ہوگئے ہیں۔ جاں بحق ہونے والوں میں 10 خواتین اور ایک نوجوان شامل ہے۔ اطلاع ملتے ہی جونی پولیس اسٹیشن اور ایس ڈی آر ایف کی ٹیم موقع پر پہنچ گئی اور راحت رسانی کا کام شروع کردیا ہے۔ جائے حادثہ پر 3 تھانوں سے پولیس فورس کو بھی طلب کیا گیا کیونکہ جائے حادثہ پر لوگوں کی بڑی بھیڑ موجود تھی۔ پولیس کمشنر اور کلکٹر سمیت تمام اعلیٰ افسران موقع پر موجود ہیں۔ راحت اور بچاؤ کا کام جاری ہے۔
اس وقت جو معلومات سامنے آئی ہیں ان میں 10 افراد کو بچا لیا گیا ہے جن میں 2 لڑکیاں اور 3 مرد شامل ہیں۔ وزیراعلیٰ نے ٹویٹ کے ذریعے ریسکیو آپریشن کے بارے میں معلومات شیئر کی ہیں۔مندر میں حادثے کی اطلاع ملتے ہی سابق وزیر جیتو پٹواری اور علاقائی ایم ایل اے آکاش وجے ورگیہ موقع پر پہنچ گئے۔ سی ایم شیوراج سنگھ چوہان اندور میں مندر حادثے کے بعد صورتحال پر نظر رکھے ہوئے ہیں۔ انہوں نے کلکٹر، کمشنر سمیت اعلیٰ حکام کو فوری طور پر ریسکیو آپریشن میں تیزی لانے کی ہدایت دی۔ سی ایم شیوراج سنگھ چوہان نے ٹویٹ کرکے اس حادثے پر گہرے دکھ کا اظہار کیا ہے اور ریسکیو آپریشن کے بارے میں بھی جانکاری دی ہے۔
انہوں نے بتایا کہ اب تک 10 افراد کو بچا لیا گیا ہے۔ ہم پوری قوت کے ساتھ ریسکیو آپریشن میں مصروف ہیں، میں انتظامیہ کے ساتھ مسلسل رابطے میں ہوں۔ نو لوگ اندر ہیں جو محفوظ ہیں۔ وہیں اس حادثے پر وزیر اعظم نریندر مودی نے غم کا اظہار کیا اور متاثرہ افراد کی بہتری کے لیے بھگوان دعا کی۔ مودی نے ایک ٹویٹ کے ذریعے کہا کہ اندور حادثے کے بارے میں جان کر انہیں بہت دکھ ہوا ہے۔ انہوں نے وزیر اعلیٰ شیوراج سنگھ چوہان سے بات کر کے حادثے کی تازہ ترین معلومات بھی حاصل کیں۔ مودی نے کہا کہ ریاستی حکومت تیزی سے راحت اور بچاؤ کے کاموں میں مصروف ہے۔
