ریاست مدھیہ پریش کے وزیراعلی کمل ناتھ نے کہا کہ جھارکھنڈ انتخابات کے نتائج نے بھارتیہ جنتاپارٹی کے مسائل سے توجہ ہٹانے اور عوام کو گمراہ کرنے کی سیاست کو سخت جواب دے دیا ہے۔
کمل ناتھ نے ٹوئٹ کرکے کہا کہ اس سیاست کا اب خاتمہ ہونا شروع ہوگیا ہے، یہ بی جے پی کی غلط پالیسیوں کی شکست ہے، آج ملک کا بیدار شہری حساس معاملوں پر بات کرنا چاہتا ہے اور اس کا حل چاہتا ہے۔
'اس کے سامنے آج روزی روٹی کا بحران ہے، اسے دیگر مسائل کے نام پر گمراہ نہیں کیا جاسکتا ہے'۔
انہوں نے کہا کہ ان نتائج نے ثابت کردیا ہے کہ ملک میں نفرت اور تعصب کے نظریات کے لئے آج بھی کوئی جگہ نہیں ہے، ملک کے عوام کا بھائی چارہ، باہمی محبت کا نظریہ آج بھی بھروسے پر قائم ہے۔
انہوں نے لکھا ہے کہ اس ملک کو کوئی بھی طاقت تقسیم نہیں کرسکتی، ان نتائج پر میں کانگریس صدر سونیا گاندھی، عظیم اتحاد کے رہنماوں اور جھارکھنڈ کے سبھی کانگریسوں کو بھی مبارکباد دیتا ہوں اور وہاں کے بیدار ووٹروں کا شکریہ ادا کرتا ہوں۔
