بی جے پی میں شامل ہوتے ہی دو عہدوں سے سرفراز

بھوپال میں وزیراعلی شیوراج سنگھ چوہان کی موجودگی میں بڈھا ملیہرا سے کانگریس کے رکن اسمبلی پردھیومن سنگھ لودھی نے بی جے پی میں شمولیت اختیار کر لی ہے۔

بی جے پی میں شامل ہونے والے کانگریس کے ایم ایل اے پردھیومن سنگھ لودھی کو مدھیہ پردیش اسٹیٹ سول سپلائی کارپوریشن لمیٹڈ کا چیئرمین مقرر کیا گیا ہے۔ اس کے علاوہ لودھی کو کابینی وزیر کا درجہ بھی دیا گیا ہے۔

بی جے پی کے ایم ایل اے رامشور شرما نے رکن اسمبلی پردھیومن سنگھ لودھی کا استعفیٰ قبول کرلیا ہے۔ رامشور شرما اسمبلی اسپیکر کے انتخاب تک کارگزر اسپیکر کے عہدے پر فائز ہیں۔

ادھر مدھیہ پردیش حکومت نے آزاد ایم ایل اے پردیپ جیسوال کو مدھیہ پردیش اسٹیٹ مائننگ کارپوریشن لمیٹڈ کا چیئرمین بھی مقرر کیا ہے اور انہیں کابینہ کے وزیر کا درجہ بھی دیا گیا ہے۔

اب ریاستی اسمبلی میں کانگریس کی طاقت کم ہوکر 91 ہوگئی ہے۔

واضح رہے کہ رواں برس مارچ میں کانگریس سے جیوترادتیہ سندھیا کے استعفیٰ نے ان 22 اراکین اسمبلی کے استعفیٰ کی راہ کو آسان کردیا، جنہوں نے مدھیہ پردیش میں کمل ناتھ کی زیرقیادت کانگریس حکومت میں ہلچل پیدا کردی۔ جس کے نتیجے میں ریاست میں ان کی حکومت کا خاتمہ ہوا۔ جس کے بعد 23 مارچ کو شیوراج سنگھ چوہان نے وزیراعلی کے عہدے کا حلف لیا۔

یہ بھی بتادیں کہ جولائی کے پہلے ہفتے کے شروع میں ہی مدھیہ پردیش میں چوہان حکومت میں شامل ہونے والے 28 وزرا کو بھوپال کے راج بھون میں گورنر کے ذریعہ عہدہ اور رازداری کا حلف دلایا گیا۔