مسلم نمائندہ کمیٹی نے مطالبہ کیا کہ چندن کھیڑی گاؤں میں پیش آئے فرقہ وارانہ معاملے میں غیر جانبدارانہ طریقے سے کارروائی کی جائے۔ کشیدگی کے پیش نظر علاقے میں دفعہ 144 نافذ کر دی گئی ہے۔
دراصل مدھیہ پردیش کے ضلع اندور کے چندن کھیڑی گاؤں میں رام مندر تعمیر کے حوالے سے وی ایچ پی کی جانب سے ریلی نکالنے پرعلاقے میں حالات کشیدہ ہو گئے۔
گاؤں میں دو روز قبل فرقہ وارانہ واقعہ پیش آیا تھا، جس میں مخصوص طبقہ کی عبادت گاہ، گاڑیاں اور مکانات کو نقصان پہنچایا گیا تھا، جس پر پولیس کارروائی سے مسلم طبقہ سخت ناراض ہے۔
مسلم نمائندہ کمیٹی اور شہر قاضی ابو ریحان فاروقی انسپکٹر جنرل آف پولیس دفتر پہنچے اور میمورنڈم سونپا، اس دوران مطالبہ کیا گیا کہ شر پسند عناصر کے خلاف غیر جانبدارانہ طریقے سے سخت کارروائی کی جائے۔
شہر قاضی ابو ریحان فاروقی نے کہا کہ، 'رام مندر کے چندے کے نام پر فضا خراب کی جارہی ہیں، اقلیتی طبقے کو ڈرایا جا رہا اور ایسا پیغام دیا جا رہا ہے کہ وہ محفوظ نہیں ہیں۔'
انہوں نے کہا کہ، 'عبادت گاہوں اور مکانات کو توڑا جا رہا ہے، جو ویڈیو میں صاف نظر آ رہا ہے، ایسے شر پسند عناصر کے خلاف خلاف سخت کاروائی کی جائے۔'
مزید پڑھیں:
اندور: بھگوا ریلی سے فرقہ وارانہ کشیدگی، دفعہ 144 نافذ، 27 گرفتار
انسپکٹر جنرل آف پولیس یوگیش دیشمکھ نے بتایا کہ، 'مسلم طبقہ کی جانب سے ایک میمورنڈم ملا ہے، جس میں مطالبہ کیا گیا ہے کہ بنا کسی کے دباؤ کے کارروائی کی جائے تو میں کہنا چاہتا ہوں کہ بھارت کے کسی بھی عوام کے ساتھ امتیازی سلوک نہیں کیا جاتا اور ہم اس معاملے میں غیر جانبدارانہ طریقے سے کارروائی کر رہے ہیں۔'
