مدھیہ پردیش کے وزیراعلی کمل ناتھ نے کہا ہے کہ مسیحی برادری نے انسانی سماج کو جوڑنے، محبت اور تعاون کے جذبات کو مستحکم کرنے میں جو کردار ادا کیا اسے پوری دنیا یاد رکھے گی۔مسٹر کمل ناتھ آج گووندپورا میں واقع چرچ میں کرسمس کے موقع پر منعقد پروگرام سے خطاب کررہے تھے۔
انہوں نے کہا کہ آج دنیا کو امن، بھائی چارے اور آپسی پیار ومحبت کی ضرورت ہے۔ اس لئے یہ ضروری ہے کہ ہم یسوح مسیح کے راستے کو اپنائیں اور ذات، مذہب، زبان اور سرحدوں کو لیکر جو تنازع ہے انہیں ختم کرکے انسانیت کی فلاح وبہبود کے لئے کام کریں۔
انہوں نےکہا کہ مختلف مذہبی کتابوں کی طرح بائبل ایسی کتاب ہے جس کا ہدف نوع انسانی کےدرمیان یکجہتی پیدا کرنا ہے۔
وزیراعلی نے کہا کہ کرسمس ایک ایسا تہوار ہے جو پوری دنیا میں منایا جاتا ہے۔ ہمارے ملک میں بھی صرف مسیح سماج نہیں دیگر زمرے کے لوگ بھی اپنی شاندار بھائی چارے کی روایت جاری رکھتے ہوئے اس تہوار میں شامل ہوتے ہیں۔
انہوں نے کہا کہ میں بچپن سے کرسمس کے تہوار میں شرکت کرتا رہا ہوں۔ وزیراعلی نے کہا کہ میل جول کی یہ روایت ہمارے ملک اور پوری دنیا کومتحد رکھنے کے لئے ضروری ہے۔
