مدھیہ پردیش کے ضلع چھندواڑا پہنچے وزیراعلی کمل ناتھ نے سرجیکل اسٹرائک پر سوال اٹھائے ہیں۔
انہوں نے وزیراعظم مودی سے سوال پوچھا ہے کہ سرجیکل اسٹرائک کی حقیقت بتائیں اور اس کے ثبوت پیش کریں، صرف میڈیا میں بیان بازی کرنے سے کچھ نہیں ہوتا۔
کمل ناتھ نے کہا کہ وہ بھارتی فوج پر فخر اور اعتماد ہے، لیکن وزیراعظم نریندر مودی کو ملک کی عوام کو بتانا چاہیے کہ سرجیکل اسٹرائک کہاں ہوئی، کیسے ہوئی اور اس میں کتنے لوگ ہلاک ہوئے۔
وہیں وزیراعلی کمل ناتھ نے ریاست کے سابق وزیراعلی شیوراج سنگھ کو بھی تنقید کا نشانہ بنایا ہے اور الزام عائد کیا کہ وہ جھوٹ کی سیاست کرتے ہیں۔
وزیراعلی کمل ناتھ دو روزہ دورے پر چھنڈواڑا پہنچے، جہاں انہوں نے ایک ضلع ہسپتال کے ہیلتھ سینٹر کے افتتاح کے بعد کہا کہ جب شیوراج چوہان چھندواڑا آئے تھے اور چھند واڑا کے ترقیاتی کام کو اپنی محنت بتائی تھی۔ ایسے میں شیوراج سنگھ کو حقیقت سے روبرو ہونا چاہیے۔
واضح رہے کہ گزشتہ روز شیوراج سنگھ نے چھندواڑا کے ماچاگورا باندھ اور میڈیکل کالج کو بی جے پی کی دین بتائی تھی۔
جس پر کمل ناتھ نے ردعمل ظاہر کرتے ہوئے کہا تھا کہ جب ریاست کے وزیراعلی دگوجئے سنگھ تھے، اس دور میں ہی ماچاگورا باندھ کی بھومی پوجن کردیا گیا تھا، جس کے آج پورے پختہ ثبوت موجود ہیں اور میڈیکل کالج من موہن سنگھ کی حکومت کے دوران ہی منظور کرلیا گیا تھا، اس کے بعد شیوراج سنگھ اس کا جھوٹا کریڈیٹ لے رہے ہیں۔
