اجین اور مندسور واقعات کے ذمہ داروں پر کارروائی ہو: دگ وجے سنگھ

کانگریس کے سینئر رہنما دگ وجے سنگھ نے چیف سیکریٹری اور ڈی جے پی سے اجین اور مندسور میں رام مندر کے لیے نکالی گئی چندہ ریلی کے دوران ہوئے حادثے کے ذمہ داروں پر کارروائی کا مطالبہ کیا ہے۔

کانگریس کے راجیہ سبھا رکن دگ وجے سنگھ نے اجین اور مندسور میں چندہ ریلی کے دوران ہوئے واقعات کے ذمہ داروں کے خلاف سخت کارروائی کرنے کا مطالبہ کیا۔

دگ وجے سنگھ نے کہا کہ جنہوں نے بھی مذہبی تشدد پھیلانے کا کام کیا تھا، اس کے خلاف سخت کاروائی کی جائے۔

انہوں نے کہا میں نے مرکزی حکومت کو بجرنگ دل اور سیمی پر پابندی عائد کرنے کی بھی بات کہی ہے۔ انہوں نے کہا کہ آج بھگوان رام کے مندر کے نام پر چندہ جمع کیا جا رہا ہے اور چندہ لینے والے محلوں میں لاٹھی، ڈنڈا، تلوار لے کر جا رہے ہیں۔ چندے کی آڑ میں مسلم علاقوں کو ٹارگیٹ کیا جا رہا ہے۔

انہوں نے کہا حکومت نے رام مندر نیاس تشکیل دی ہے۔ انہوں نے استفسار کیا کہ جو لوگ رام مندر کے نام پر چندہ وصولی کر رہے ہیں، ان کو کس نے حق دیا ہے۔

انہوں نے کہا کہ ان سب معاملات پر ریٹائرڈ جج اور آئی پی ایس افسروں کی کمیٹی بنا کر اس کی جانچ کی جانی چاہیے۔