کپواڑہ: مہاراشٹر کے وزیر اعلیٰ ایکناتھ شندے منگل کو جموں و کشمیر کے کپواڑہ ضلع میں چھترپتی شیواجی مہاراج کے مجسمے کی نقاب کشائی کی۔جموں و کشمیر انتظامیہ کے ایک سینئر افسر نے ای ٹی وی بھارت کو بتایا کہ " جموں و کشمیر کے کپواڑہ ضلع میں بھارت اور پاکستان کی سرحد کے قریب 41 مراٹھا رائفل (مراٹھا ایل آئی) میں چھترپتی شیواجی مہاراج کا گھڑ سوار مجسمہ نصب کیا گیا ہے۔ مجسمے کی نقاب کشائی آج مہاراشٹر کے وزیر اعلی ایکناتھ شندے نے کی۔ ثقافتی امور کے وزیر سدھیر منگنٹیوار اورجموں و کشمیر کے لیفٹیننٹ گورنر منوج سنہا بھی اس موقع پر موجود تھے۔"
ان کا مزید کہنا تھا کہ "اس مجسمے کے لیے پانچ قلعوں یعنی شیو نیری، تورنا، راج گڑھ، پرتاپ گڑھ اور رائے گڑھ سے مٹی اور پانی لایا گیا تھا۔ یہ مجسمہ ساڑھے دس فٹ اونچا ہے اور اسے 7 بائی 3 مربع پر بنایا گیا ہے، جس کی اونچائی تقریباً اتنی ہی ہے۔ یہ مجسمہ 'آمہی پونےکر فاؤنڈیشن' اور چھترپتی شیواجی مہاراج اسمارک سمیتی کے تعاون سے بنایا گیا ہے۔ مجسمہ تقریباً 2200 کلومیٹر کا فاصلہ طے کرنے کے بعد گزشتہ ہفتے کپواڑہ لایا گیا تھا۔" قابل ذکر بات یہ ہے کہ شندے نے پیر کو جموں و کشمیر کے لیفٹیننٹ گورنر منوج سنہا سے ملاقات کی تھی۔
وہیں کشمیر میں چھترپتی شیواجی مہاراج کے مجسمے کو نصب کرنے کی اہمیت پر بات کرتے ہوئے ان کا کہنا تھا کہ "اس سال، چھترپتی شیواجی مہاراج کی تاجپوشی کی 350 ویں سالگرہ کے موقع پر، وزیر اعلی ایکناتھ شندے کپواڑہ میں فوجیوں کے ساتھ دیوالی کی دعوت کا پروگرام منائیں گے۔ اس کے پیچھے مقصد یہ تھا کہ، دشمنوں سے لڑنے والے فوجیوں کو روزانہ کی بنیاد پر چھترپتی شیواجی مہاراج کے مجسمے کو دیکھ کر ان کی مثالی اور اخلاقی اقدار سے تحریک ملے اور وہ ہندو راجہ کی بہادری کو یاد کریں اور دشمنوں کے خلاف لڑنے کی طاقت حاصل کریں۔"
یہ بھی پڑھیں:چھترپتی شیواجی کی زندگی ایک نظریہ اور تحریک، امت شاہ
ان کا مزید کہنا تھا کہ "اس سے قبل اس مراٹھی حکمران کے دو مجسمے مراٹھا رجمنٹ نے جنوری 2022 میں جموں و کشمیر میں نصب کیے تھے۔ ان میں سے ایک مجسمہ ایل او سی کے قریب سطح سمندر سے 14,800 فٹ کی بلندی پر نصب کیا گیا ہے۔ شیواجی مہاراشٹر میں ’سوراج‘ (خود حکمرانی) قائم کرنا چاہتے تھے، شیو ازم اور تصوف کے مضبوط اثر کو ظاہر کرتا ہے۔ بھگوان شیو، جو مہادیو کے طور پر قابل احترام ہیں، اور کشمیر کے درمیان تعلقات ہمارے پرانوں میں اچھی طرح سے دستاویزی ہیں۔ چھترپتی شیواجی مہاراج کی جنگی پکار، "ہر ہر مہادیو" کا کشمیر سے ایک اہم تعلق ہے۔"
