کپوارہ: پانی کی قلت پر ہندوارہ میں احتجاج

شمالی کشمیر کے قصبہ ہندوارہ میں پالپورہ ماگام سے تعلق رکھنے والی خواتین نے احتجاج کرتے ہوئے محکمہ جل شکتی کے خلاف نعرے بازی کی۔

ضلع کپوارہ کے پالپورہ، ماگام سے تعلق رکھنے والی کئی خواتین نے تحصیل صدر مقام ہندوارہ میں محکمۂ جل شکتی کے دفتر کے باہر احتجاج کیا۔ احتجاج کررہی خواتین نے محکمہ جل شکتی کے افسران کو تنقید کا نشانہ بناتے ہوئے ان کے خلاف نعرے بازی کی۔

انہوں نے دعویٰ کیا کہ پالپورہ کے لوگ عرصۂ دراز سے پینے کے صاف پانی سے محروم ہیں، جس کے سبب انہیں مقامی نالوں کا گندہ پانی استعمال میں لانا پڑتا ہے۔

احتجاج کررہی خواتین نے بتایا کہ بارہا اس ضمن میں انہوں نے محکمۂ جل شکتی سے علاقے میں پانی کی قلت کے حوالے سے شکایات کیں تاہم ان کے مطابق محکمۂ جل شکتی کے افسران نے صرف یقین دہانیاں کرائیں، جب کہ اس ضمن میں ٹھوس اقدامات نہیں اٹھائے گئے۔

انہوں نے کہا کہ علاقے میں پانی کی شدید قلت اور انتظامیہ کی جانب سے نظر انداز کیے جانے کے بعد مجبوراً انہوں نے تحصیل صدر مقام آکر احتجاج کیا۔

احتجاج کے سبب ٹریفک کی نقل و حمل متاثر ہوئی جس کے بعد انتظامیہ کے افسران نے موقع پر پہنچ کر احتجاج کررہی خواتین کو یقین دلایا کہ ان کی جائز مانگوں کو بہت جلد پورا کیا جائے گا۔