شمالی کشمیر کے سب ضلع ہندوارہ میں اے ڈی سی آفس کے باہر بار ایسوسی ایشن ہندوارہ سے وابستہ کئی وکلاء نے احتجاج مظاہرہ کرتے ہوئے اے ڈی سی کو فوری طور پر تبدیل کیے جانے اور ان کے خلاف قانونی کارروائی عمل میں لانے کا مطالبہ کیا۔
احتجاج کررہے وکلاء کا کہنا ہے کہ گزشتہ سات ماہ سے فائلیں اے ڈی سی آفس ہندوارہ میں دھول چاٹ رہی ہیں، جن کی شنوائی نہ ہونے کے سبب عوام کو دقتوں کا سامنا کرنا پڑرہا ہے۔
انہوں نے دعویٰ کیا کہ جب اس ضمن میں بار ایسوسی ایشن سے وابستہ وکلاء نے اے ڈی سی آفس جاکر فائلوں کے التواء میں پڑے ہونے کا سبب پوچھا تو ان کے مطابق اے ڈی سی نے وکلاء کے ساتھ بدسلوکی کرنے کے علاوہ غیر مناسب زبان بھی استعمال کی۔
مزید پڑھیں؛ کپوارہ: پانی کی قلت پر ہندوارہ میں احتجاج
وکلاء نے کہا کہ اے ڈی سی کے غیر مناسب رویہ پر ان کے خلاف کارروائی کیے جانے اور انہیں فوری طور پر تبدیل کیے جانے سے متعلق بار ایسوسی ایشن نے عدالت میں عرضی بھی دائر کی ہے۔ بار ایسوسی ایشن نے احتجاج کرتے ہوئے اے ڈی سی کے خلاف فوری طور پر کارروائی کیے جانے کا مطالبہ کیا ہے۔
