جنوبی کشمیر کے ضلع کولگام کے یمرچھ یاری پورہ میں عسکریت پسندوں اور سکیورٹی فورسز کے مابین فائرنگ کا تبادلہ ہوا۔
تفصیلات کے مطابق کولگام ضلع کے یمرچھ یاری پورہ علاقے میں عسکریت پسندوں کی موجودگی کی خفیہ اطلاع ملنے پر سکیورٹی فورسز جن میں فوج کی 34 راشٹریہ رائفلز، سنٹرل ریزرو پولیس فورسز اہلکار اور جموں وکشمیر پولیس شامل ہیں نے مشترکہ طور پر علاقے کو گھیرے میں لیکر عسکریت پسندوں کو ڈھونڈ نکالنے کی کوشش شروع کردی۔ سیکیورٹی ذرائع کے مطابق تلاشی کارروائی کے دوران جب فورسز اہلکار ایک مکان کی طرف بڑھنے لگے تو وہاں موجود عسکریت پسندوں نے فورسز اہلکاروں پر فائرنگ کی۔ اہلکاروں نے پوزیشن سنبھال کر جوابی کارروائی کرتے ہوئے عسکریت پسندوں پر فائرنگ کی جو مقامی لوگوں کے مطابق قریب 15 منٹ تک جاری رہی۔
ایک سینئر پولیس افسر نے بھی فورسز اور عسکریت پسندوں کے مابین فائرنگ کے تبادلےکی تصدیق کی ہے۔
طرفین میں 15 منٹ تک فائرنگ کا تبادلہ جارہی رہنے کے بعد بندوقیں خاموش ہوگئی اور فائرنگ رک گئی۔ تاہم گولیوں کے تبادلہ میں کسی کے زخمی یا ہلاک ہونے کی کوئی اطلاع نہیں ہے۔
فورسز اہلکاروں نے روشنی کا انتظام کرکے رات بھر عسکریت پسندوں کو ڈھونڈ نکالنے کی کوشش جاری رکھی ہوئی تھی اور یہ خبر لکھنے تک علاقے کو گھیرے میں لیکر تلاشی آپریشن جاری ہے۔
ایس۔ ایس۔ پی کولگام گوریندر پال سنگھ نے فون پر نمائندہ کو بتایا کہ علاقے میں تلاشی آپریشن جاری ہے اور عسکریت پسند شاید اندھیرے کا فایدہ اُٹھانے میں کامیاب ہوئے۔
