کوچی: کیرالہ ہائی کورٹ نے نمبی نارائنن اور سی بی آئی کے تفتیش کر رہے افسران کو نوٹس بھیجنے کا حکم دیا۔ کیرالہ ہائی کورٹ پولیس اسپیشل برانچ کے پہلے تفتیشی افسر، ایس وجین کی طرف سے دائر نظرثانی کی درخواست پر غور کر رہی تھی۔ درخواست گزار نے الزام لگایا کہ اسرو جاسوسی کیس کی تحقیقات کرنے والے سی بی آئی افسران اور نمبی نارائنن کے درمیان زمینی سودے ہوئے تھے۔
کیرالہ ہائی کورٹ کے جج جسٹس کے بابو نے عرضی کو قبول کرتے ہوئے، نمبی نارائنن اور سی بی آئی کے تفتیشی افسران سمیت فریقین کو نوٹس بھیجنے کی ہدایت دی۔ اس سے قبل کیرالہ کے ریٹائرڈ پولیس افسر ایس وجین نے اسی درخواست کے ساتھ تروونتاپورم میں سی بی آئی کی خصوصی عدالت سے رجوع کیا تھا۔ لیکن درخواست مسترد کر دی گئی تھی۔ اہم الزام یہ ہے کہ نمبی نارائنن اور راجندر ناتھ کول جو سی بی آئی کے جوائنٹ ڈائریکٹر تھے، اور کے وی ہریواتسرام جو اس وقت کے ڈی وائی ایس پی تھے، ان کے درمیان زمین کا سودا ہوا تھا۔
مرکزی حکومت، سی بی آئی، نمبی نارائنن اور دیگر متعلقہ حکام کو نوٹس جاری کیا جائے گا۔ درخواست میں زمین کے لین دین سے متعلق پاور آف اٹارنی سمیت دیگر دستاویزات منسلک کی گئی ہیں۔
