یادگیر: عید گاہ میں نمازعید الاضحیٰ ادا نہیں کی جائے گی

ریاست کرناٹک حکومت کے ہدایت نامہ کے مطابق گزشتہ سال کی طرح اس سال بھی کورونا کی وجہ سے اجتماعی طور پرعید گاہوں میں نماز عید الاضحیٰ ادا نہیں کی جائے گی۔

قدیم عید گاہ کے صدر منصور احمد افغان نے ای ٹی وی بھارت سے بات کرتے ہوئے بتایا کہ گزشتہ سال کی طرح اس سال بھی عیدالاضحیٰ کی نماز عیدگاہ میں ادا نہیں کی جائے گی۔ کیونکہ ریاستی حکومت نے عیدگاہوں میں نماز ادا کرنے پر پابندی عائد کی ہے-

انہوں نے کہا کہ ریاستی حکومت اور ریاستی وقف بورڈ نے مساجد میں پچاس فیصد مصلیان کے ساتھ نماز ادا کرنے کی اجازت دی ہے۔ اس کے علاوہ مساجد میں ایک سے زائد بار باجماعت نماز ادا کرنے کی اجازت دی گئی ہے۔ قدیم عیدگاہ صدر منصور احمد افغان نے مساجد کے ذمہ داران سے اپیل کرتے ہوئے کہا کہ اپنی اپنی مساجد میں مصلیان کی سہولت کی خاطر نماز عید الاضحیٰ کا اہتمام کریں۔

انہوں نے ریاستی حکومت کی جانب سے کورونا سے بچنے کے لئے بتائے گئے احتیاطی اقدامات پر سختی کے ساتھ عمل کرنے، ماسک لگانے اور سماجی فاصلے کا خیال رکھتے ہوئے پُرامن طریقے سے عید منانے کی اپیل کی ہے۔