کانگریس کے رکن اسمبلی اکھنڈ شرینواس مورتی کے بھتیجے پی نوین نے منگل کے روز اپنے سوشل میڈیا اکاؤنٹ پر پیغمبر اسلامؐ کی شان میں گستاخانہ پوسٹ کی جس کی وجہ سے بنگلور شہر کے مسلمانوں میں کافی ناراضگی پائی گئی اور گزشتہ دیر شب شہر بھر میں کافی ہنگامہ برپا رہا۔
متعدد سماجی و ملی تنظیموں نے بنگلور کے ڈی جے ہلی پولیس اسٹیشن میں شکایت درج کرائی لیکن کارروائی کے تیقن کے بعد بھی پولیس نے ایف آئی آر درج نہیں کی۔
بنگلور کے پُلاکیشی نگر میں لوگوں نے رکن اسمبلی اکھنڈ شرینواس مورتی کے گھر کا گھیراؤ کرتے ہوئے احتجاج کیا اور ان سے وضاحت طلب کی جس کے بعد انہوں نے ایک ویڈیو پیغام کے ذریعہ لوگوں کو پر امن رہنے کی اپیل کی اور کہا کہ ملزم کے خلاف مناسب کارروائی کی جائے گی۔
اس موقع پر مقامی مسلم نوجوانوں کی ایک کثیر تعداد ڈی جے ہلی پولیس اسٹیشن کی جانب بڑھی اور احتجاج کرتے ہوئے پولیس سے فوری طور پر ایف آئی آر درج کرنے اور ملزم کو گرفتار کرنے کا مطالبہ کیا۔
جب پولیس نے ایف آئی آر درج نہیں کی تب مشتعل ہجوم نے پولیس اسٹیشن پر پتھراؤ کر دیا اور احاطے میں موجود کئی گاڑیوں کو نذر آتش کر دیا جس کے بعد پولیس نے بھی طاقت کا استعمال کرتے ہوئے عوام پر لاٹھی چارج کیا اور آنسو گیس کے گولے داغے۔
اس واقعے میں تین لوگوں کی موت واقع ہوئی ہے جبکہ احتجاج کرنے والوں کے ساتھ ساتھ متعدد پولیس اہلکار بھی زخمی ہوئے ہیں، اس کے علاوہ 110 لوگوں کی گرفتاری عمل میں لائی گئی ہے۔ ساتھ ہی ملزم پی نوین کو بھی گرفتار کر لیا گیا ہے۔
فی الحال پورے علاقے میں ناکہ بندی کر دی گئی ہے اور گزشتہ دیر شب پولیس نے شہر میں فلیگ مارچ بھی کیا ہے۔ اعلیٰ پولیس افسران شہر کی صورت حال پر نگاہ رکھے ہوئے ہیں۔ ساتھ ہی پولیس لوگوں سے امن و امان برقرار رکھنے کی اپیل کر رہی ہے۔
اس تعلق سے بنگلور شہر کے پولیس کمشنر کمل پنت نے بھی ٹویٹ کر کے یہ اطلاع دی تھی کہ اسلام مخالف پوسٹ کرنے والے شخص کو گرفتار کر لیا گیا ہے۔ پولیس پر پتھراؤ اور گاڑیاں جلانے والے 100 سے زائد لوگوں کو بھی گرفتار کیا گیا ہے۔
انہوں نے شہر کے عوام سے امن و امان برقرار رکھنے اور پولیس کے ساتھ تعاون کرنے کی بھی اپیل کی ہے۔
مقامی لوگوں نے پولیس پر الزام لگایا کہ ایف آئی آر درج کرنے میں ٹال مٹول کرنے کی وجہ سے احتجاج پرتشدد ہو گیا۔ اگر پولیس منافرت پھیلانے والے شخص کے خلاف وقت پر ایف آئی آر درج کر لیتی تو احتجاج ختم ہوجاتا اور پرتشدد واقعات رونما نہ ہوتے۔
ریاستی وزیر داخلہ بومائی نے وزیر اعلیٰ یڈیورپا کو اس معاملے سے مطلع کیا جس کے بعد وزیراعلیٰ یڈیورپا نے ہدایات جاری کی ہیں کہ کسی کو بھی قانون ہاتھ میں نہ لینے دیا جائے اور خاطیوں کے خلاف ضرور کارروائی ہوگی چاہے وہ کوئی بھی ہو۔
باوثوق ذرائع کے مطابق شہر میں دفعہ 144 بھی نافذ کر دی گئی ہے اور ڈی جے ہلی اور کے جی ہلی پولیس اسٹیشن کی حدود میں کرفیو نافذ کیا گیا ہے۔
