ریاست کرناٹک کے ضلع گلبرگہ میں کورونا متاثرین کی تعداد بڑھ کر 205 ہوگئی ہے۔ شہر میں کورونا متاثرین کی تعداد میں دن بدن اضافہ ہوتا جا رہا ہے۔ گلبرگہ شہر میں ایک طرف شدید گرمی جبکہ دوسری طرف کورونا کا قہر جاری ہے۔
آج کے کورونا انفارمیشن ویب کے مطابق گلبرگہ میں کورونا کے 15 نئے مریضوں کا پتہ چلا ہے۔ یہ سبھی لوگ مہاراشٹر سے ضلع گلبرگہ میں آئے تھے۔ اس میں سات مرد اور آٹھ خواتین شامل ہیں۔ اس طرح گلبرگہ ضلع میں کورونا متاثرین کی تعداد بڑھ کر 205 جا پہنچی ہے۔
ریاست کرناٹک میں کورونا متاثرین کی مجموعی تعداد بڑھ کر 2711 ہوگئی ہے۔ جس سے شہر میں پولیس اور محکمہ صحت افسران کی جانب سے راستوں کو بند کرکے سخت پابندی لگائی جا رہی ہے۔ پہلے سے ہی یہاں پر تجارتی مراکز کو بند کرا دیا گیا ہے۔ جس سے یہاں کے عوام اور چھوٹے بڑے دکان مالکان پریشان ہیں اور کورونا کے متاثرین کی بڑھتی ہوئی تعداد کو دیکھ کر عوام میں بھی خوف کا ماحول ہے۔
