مولانا صادق نظامی خطیب و امام مسجد چوک ضلع یادگیر نے ای ٹی وی بھارت سے بات کرتے ہوئے کہا کہ اللہ تعالیٰ نے حضور اکرم صلی اللہ علیہ وسلم کا احترام کرنے اور اپنی جانوں سے بڑھ کر محبت کرنے کا حکم فرمایا ہے، ہمارے سامنے صحابہ کرام کی پوری زندگی آئینے کی طرح موجود ہے کہ وہ کس طرح حضور اکرم صلی اللہ علیہ وسلم پر جان نچھاور کردیتے اور اپنی ساری دولت خرچ کردیتے تھے، نبی کریم کے حکم پر اپنا سب کچھ قربان کیا کرتے تھے۔ ساتھ ہی پوری زندگی نبی کریم کے بتائے ہوئے راستے پر چلا کرتے تھے۔
انہوں نے کہا کہ آج ہم دیکھتے ہیں کہ آئے دن کوئی نہ کوئی نبی کریم کی شان میں گستاخی کرتا ہے یہ کافی افسوس کی بات ہے۔ مولانا صادق نظامی نے مزید کہا کہ جو کوئی بھی ایسی حرکت کرتا ہے تو حکومت کو چاہیے کہ ایسے لوگوں کے خلاف سخت سے سخت کارروائی کرتے ہوئے گرفتار کریں اور انہیں سخت سزا دے۔ کیوں کہ مسلمانوں کے لیے نبی کریم کی عزت و احترام سب سے بڑھ کر ہے۔
انہوں نے مسلمانوں سے بھی اپیل کی کہ نبی کریم صلی اللہ علیہ وسلم کے خلاف یا ان کی شان میں نازیبا الفاظ استعمال کرنے والوں کے خلاف آواز بلند کریں اور جگہ جگہ ایسے افراد کے خلاف پولیس میں شکایت درج کروائیں، تاکہ آئندہ کوئی بھی اس طرح کی اوچھی حرکت کرنے سے باز آجائے۔