گلبرگہ: ریاست کرناٹک میں 10 مئی کو ہونے والے اسمبلی انتخابات کے مدنظر سیاسی گہماگہمی عروج پر پہنچ چکی ہے۔ تمام سیاسی جماعتوں نے ووٹرز کی توجہ اپنی اپنی طرف راغب کرنے کے لئے اپنی پوری طاقت جھونک دی ہے۔ کانگریس کی جانب سے راہل گاندھی، پرینکا گاندھی اور پارٹی کے صدر ملک ارجن کھڑگے سمیت تمام اعلیٰ رہنما زور شور سے انتخابی مہم چلا رہے ہیں۔
گلبرگہ میں وزیراعظم نریندرمودی کے انتخابی مہم کے ایک دن بعد آج کانگریس پارٹی کی جنرل سکریٹری پرینکا گاندھی نے یہاں روڈ شو کرتے ہوئے انتخابی مہم چلائی۔پرینکا گاندھی نے کانگریس امیدوارکی حمایت میں انتخابی مہم کی قیادت کرتے ہوئے بی جے پی کی قیادت والی مرکزی حکومت پر جم کرتنقید کی۔ انتخابی مہم کے دوران پرینکا گاندھی نے عوام سے کانگریس کے امیدواروں کو جتانے کی اپیل کی ہے۔ انہوں نے کہاکہ کرناٹک اسمبلی انتخابات میں جو وعدے کئے گئے ہیں اقتدار میں آنے کے بعد اسے ہر حال میں پورا کرنے کی کوشش کی جائے گی۔ کانگریس نے ہمیشہ سے ہی عوام لوگوں کے ساتھ مل کر ملک کی ترقی کے لئے کام کیا ہے۔
