مودی نے کرناٹک کے سدھ گنگا مٹھ میں طلبا سے خطاب کرتے ہوئے کہا کہ 'ہم پڑوسی ملک پاکستان سے ہجرت کرکے آئے دلت، سکھ، جین اور دوسرے مذاہب کے پناہ گزینوں کے مفاد میں سی اے اے لے کر آئے ہیں اور ہم نے ان کے تئیں اپنی ذمہ داری کو پورا کیا ہے'۔
انہوں نے سی اے اے کے خلاف ہو رہے مظاہروں کو دلتوں، پچھڑوں، سکھ، جین اور دیگر کمیونٹی کے خلاف بتاتے ہوئے کانگریس اور اس کی حمایت یافتہ پارٹیوں کو چیلنج کرتے ہوئے کہا کہ 'اگر ہمت ہے تو کانگریس اور اس کے اتحادی پاکستان کے خلاف مظاہرہ کریں، جہاں ہر مذہب کی اقلیتوں پر ظلم ہو رہے ہیں'۔
وزیر اعظم نے کہا ہم ان کے مفاد کے لیے قانون لے کر آئے جنہیں دہائیوں سے تشدد کا نشانہ بنایا گیا ہے جب سے بی جے پی اقتدار میں آئی ہے تب سے ملک میں امن و امان کا ماحول قائم ہوا ہے۔
وزیر اعظم نے اپنے دورے کے دوران سدھ گنگا مٹھ کے پجاری آنجہانی شوكمارسوامي جی کو خراج عقیدت پیش کی ۔انہوں نے پیجاور مٹھ کے سوامی کو بھی یاد کیا جن کا حال ہی میں انتقال ہو گیا تھا۔
اس سے پہلے مٹھ انتظامیہ نے وزیر اعظم مودی کا گرم جوشی سے استقبال کیا۔ان کے ساتھ اس پروگرام میں کرناٹک کے وزیر اعلی بی ایس ید یورپا، مرکزی وزیر سدانند گوڑا، پرہلاد جوشی، سریش انگاڑی اور دیگر رہنما موجود تھے۔
