ریاست کرناٹک گلبرگہ شہر میں پاپولر فرنٹ آف انڈیا گلبرگہ شاخ کی جانب سے مرکزی حکومت کے خلاف تما پوری سرکل میں احتجاج کیا گیا۔ اس موقع پر گلبرگہ کے ضلع صدر نے کہا کہ ملک بھر میں پاپولر فرنٹ کے قومی رہنما کے گھروں پر انفورسمنٹ ڈائریکٹوریٹ (ای ڈی) کے ذریعے چھاپوں کا سلسلہ جاری ہے۔
مذکورہ تنظیم کے رہنماؤں نے کہا کہ ای ڈی کی کارروائی ایک سیاسی کارروائی ہے۔ انہوں نے کہا کہ بی جے پی حکومت جب عوام مخالف اقدامات کی وجہ دباو میں ہوتی ہے۔ تب عوام کا دھیان بھٹکانے کے لیے ہمیشہ اپنے مخالفین کے خلاف کارروائی کرتی ہے۔ حکومت نے ملک میں اٹھنے والی مخالف آوازوں کو کچلنے کے لیے قومی ایجنسیوں کو اس حد تک استعمال کیا ہے کہ ایجنسیز کی ساکھ بگڑ گئی اور ان کے کام پر سوال اٹھنے لگے۔
انہوں نے کہا کہ پاپولر فرنٹ کے ذمہ داروں کے گھروں پر کی گئی چھاپے ماری بھی انتقامی کارروائی ہے۔ دراصل مودی حکومت دہلی کی سرحدوں پر جاری کسان مظاہروں کے بعد سے شدید دباؤ میں ہے۔ اس چھاپے ماری کا مقصد کسان احتجاج سے ملک کا دھیان ہٹانے کی محض ایک چال ہے۔
