منگلورو: کرناٹک کے منگلورو میں ایک اور قتل کا واقعہ پیش آیا ہے۔ منگلورو کے سورتھکل علاقے میں جمعرات کی شام چار نامعلوم حملہ آوروں نے فاضل نام کے ایک شخص کا قتل کر دیا۔ سورتھکل علاقے میں فاضل ایک دکان کے باہر کھڑا تھا جہاں پر چار نامعلوم افراد تیز دھار ہتھیاروں کے ساتھ آئے اور فاضل پر حملہ کردیا جس میں فاضل شدید طور پر زخمی ہوا۔ فاضل کو فوری طور پر ایک نجی ہسپتال میں لے جایا گیا، جہاں اس کی موت ہوگئی۔ اس حملے کا پورا منظر سی سی ٹی وی میں ریکارڈ ہوگیا ہے۔
واضح رہے کہ گذشتہ روز کرناٹک کے ساحلی ضلع دکشن کنڑ میں بی جے پی یوا مورچہ کے کارکن کا قتل کر دیا گیا تھا جس کے بعد متعدد ہندو تنظیموں نے احتجاجاً بند کی کال دی تھی۔ بی جے پی کارکن کے قتل کے بعد فرقہ وارانہ طور پر حساس ضلع اور ساحلی علاقے میں سیکوریٹی بڑھا دی گئی، جب کہ اس واقعہ نے فرقہ وارانہ رخ اختیار کرلیا ہے۔
یہ بھی پڑھیں:
BJP Leader Murder Case: کرناٹک بی جے پی رہنما کے قتل معاملے میں دو افراد گرفتار
