ریاست کرناٹک کے ضلع بیدر میں 'خادم الحجاج کمیٹی' کی جانب سے ایک پریس میٹ کا انعقاد عمل میں آیا۔ اس موقع پر خادم الحجاج کمیٹی بیدر کے سیکریٹری سید منصور احمد قادری نے میڈیا سے بات کرتے ہوئے کہا کہ حجاج کرام اس برس حیدرآباد کے بجائے بنگلور ایئرپورٹ سے حج کے لیے روانہ ہوں گے۔
عازمین حج سے اپیل
کمیٹی کے سیکریٹری سید منصور احمد قادری نے کہا کہ پہلے کی بنسبت اس برس صرف 25 فیصد ہی عازمین نے حج کا فارم بھرا ہے۔ اس لیے انہوں نے درخواست کی ہے کہ جو صاحب استطاعت ہیں انہیں حج کے لیے جانا چاہیے۔
سید منصور احمد قادری نے ضلع بیدر کے عوام سے اپیل کی ہے کہ مرکزی حج کمیٹی نے حج فارم داخل کرنے کی آخری تاریخ میں توسیع کرتے ہوئے یکم جنوری کردی ہے۔ اس لیے اب یکم جنوری تک خواہشمند عازمین حج فارم بھرسکتے ہیں۔
