'دو مصلیوں کے درمیان کم از کم تین فٹ کا فاصلہ رکھیں'

بھارت میں لاک ڈاؤن کے پانچویں مرحلے میں ان لاک ون بھی کیا گیا ہے، ایسے میں 8 جون سے تمام مذہبی مقامات کو کھولنے کی اجازت دے دی گئی ہے ۔مسلمانوں کے سامنے جو سب سے بڑا مسئلہ ہے وہ جماعت کے دوران فاصلے کا ہے۔ اس پر مفتی سمیع الدین قاسمی نے ای ٹی وی بھارت سے بات چیت کی۔

بھارت میں 8 جون سے تمام مذہبی مقامات کو اجتماعی عبادت کے لئے کھول دیے جانے کی صورت میں خاص کر مساجد میں باجماعت نمازیوں کے لئے جو ہدایت دی گئی ہیں ان میں دو مصلیوں کے درمیان سماجی فاصلہ برقرار رکھنے کی اپیل کی گئی ہے۔

کیا اجتماعی عبادت کے لیے با جماعت نماز ادا کرتے وقت دو مصلیان کے درمیان فاصلہ رکھا جا سکتا ہے؟ اس سوال پر مفتی سمیع الدین قاسمی نے ای ٹی وی بھارت سے بات کرتے ہوئے کہا کہ 8 جون سے ملک میں تمام مساجد کو اجتماعی عبادت کے لیے کھولا جارہا ہے، جس کے لئے ہم حکومت ہند کا شکریہ ادا کرتے ہیں۔

انہوں نے بتایا کہ جہاں تک دونوں مصلیان کے درمیان فاصلے کی بات ہے تو مرکزی اداروں کا کوئی فتوی جاری نہیں ہوا ہے، ہاں مگر امارات شرعیہ کرناٹک کی رہنما ہدایات میں یہ بات بتائی گئی ہے کہ مساجد میں باجماعت نماز ادا کرتے وقت دو مصلیوں کے درمیان کم از کم تین فٹ کا فاصلہ رکھیں۔

انہوں نے کہا کہ دیگر ممالک میں بھی لوگ اس طرح نماز ادا کر رہے ہیں۔ مفتی سمیع الدین نے کہا کہ حکومت ہند کی جو ہدایات ہیں ان پر عمل کرتے ہوئے نماز باجماعت ادا کریں۔