کرناٹک کے ایک گاؤں کے مقامی افراد نے ایک ایمبولینس اور محکمہ صحت کی گاڑی پر پتھراؤ کیا جو علاقے میں موجود ایک کووڈ۔19 مریض کی لاش کو آخری رسومات کے لیے لے جا رہے تھے ۔
ذرائع کے مطابق یہ واقعہ ضلع کولار کے گاؤں بنگاراپیٹ میں اس وقت پیش آیا جب اسپتال کے عملے نے لاش اسپتال سے لی اور اس کی آخری رسومات کے لیے نکل گئے۔ جب یہ بنگاراپیٹ گاؤں پہنچے تو وہاں کے مقامی لوگوں نے انہیں روکا اور ان سے بحث کرنے لگے۔ یہ تنازع بڑھ گیا جس کے بعد مقامی لوگوں نے محکمہ صحت کی گاڑی پر پتھراؤ کرنا شروع کردیا۔
اس کے بعد، گاؤں میں کشیدگی مزید بڑھ گئی اور مقامی افراد نے اسپتال کے عملے کا گھیراؤ کیا اور مبینہ طور پر مریض کی لاش نہ اٹھانے کا مطالبہ کیا۔
واقعے کی اطلاع ملنے پر کولار پولیس موقع پر پہنچی اور مقامی لوگوں کو سمجھا بجھا کر معاملہ رفع دفع کیا۔
ذرائع نے مزید بتایا کہ عملے کو نشانہ بنانے والوں کے خلاف مقامی تھانے میں مقدمہ درج کیا گیا ہے۔
