مظفرنگر: ریاست اتر پردیش کے ضلع مظفر نگر کی جمعیت علمائے ہند کی بڈھانہ یونٹ کے زیراہتمام نگر سکریٹری نوید فریدی کے تعاون سے رمضان کٹ تقسیم کیمپ کا انعقاد کیا گیا۔ اس پروگرام کا آغاز رمضان المبارک کے مہینے میں غریبوں میں رمضان کٹس تقسیم کرنے سے ہوا۔ راشن کٹ میں چاول، آٹا، چینی، تیل، مصالحہ ،دالیں، کھجور اور صابن وغیرہ رکھا گیا تھا۔
جمعیت علمائے ہند بڈھانہ کے عہدیداروں نے اپنی پرانی روایت کا خیال رکھتے ہوئے اس بار بھی کسی مستحق کی تصویر نہ لینے کا فیصلہ کیا۔ اطلاع کے مطابق قصبہ کی نئی بستی میں مولانا عمران حسین پوری نے اس کام کو سراہا۔ مولانا عمران حسین پوری نے کہا کہ غریبوں کی مدد کی جائے کیونکہ ان کا حق ہم پر ہے۔ سٹی صدر حافظ شیردین نے سراہتے ہوئے کہا کہ جمعیت علمائے ہند کے تمام عہدیداران اپنی اپنی گلی، محلے اور قریبی علاقوں میں غریبوں کی مدد کریں، اور اس کا دکھاوا نہ کریں۔
