کرناٹک کے ضلع یادگیر میں کورونا کے معاملوں میں تیزی سے اضافہ ہورہا ہے اس کے پیش نظر ڈپٹی کمشنر ڈاکٹر راگاپریا نے ڈاکٹرس کو ہدایت دی ہے کہ تعلقہ شاہ پور میں واقع کیمبھاوی گورنمنٹ ہسپتال میں دس آکسیجن بیڈ قائم کیے جائیں۔
ڈپٹی کمشنر نے کہا کہ کیمبھاوی گورنمنٹ ہسپتال میں بجلی کی رسائی کے لئے جنریٹر بھی لگائے جائیں تاکہ ہنگامی صورتحال میں جرنیٹر کے ذریعے بجلی کی فراہمی ہوسکے۔
انہوں نے طبی عملہ کی کمی کے مسئلے پر میڈیکل افسر سے کہا کہ وہ اسٹاف اور دیگر معاونین کی ضرورت کے مطابق تقرری کریں تاکہ سنگین حالات میں طبی عملہ کی کمی نہیں ہو۔
واضح رہے کہ بعد ازاں ضلع ڈپٹی کمشنر نے کووڈ کیئرسنٹر مرارجی دیسائی اقامتی اسکول کا بھی معائنہ کیا، اس موقع پر محکمہ صحت و سماجی بہبود کے دیگر عہدیدار بھی موجود تھے۔
