ریاست کرناٹک کے ضلع گلبرگہ اور بیدر ضلع میں گزشتہ تین چار دنوں سے مسلسل بارش ہو رہی ہے۔ جس کی وجہ سے علاقے میں فصلوں کو زبردست نقصان پہنچ رہا ہے۔
وہیں گلبرگہ دپٹی کمشنر وی وی جیو تسنا نے ایک سرکاری اجلاس سے خطاب کر تے ہوئے کہا کہ 15 جولائی تک زبردست بارش ہونے کے امکانات ہیں۔ اس لیے ضلع بھر میں ہائی الرٹ جاری کر دیا گیا ہے۔
انہوں نے کہا کہ دیہاتوں میں عوام کو سیلابی صورت حال سے محفوظ رکھنے کے لیے ٹاسک فورس کی تشکیل دی جائےگی کیوں کہ ندیوں کے قریب واقع دیہی علاقوں میں سیلاب آسکتے ہیں۔
انہوں نے مزید کہاکہ دیہی علاقوں کو سیلاب سے محفوظ رکھنے کے لئے امدادی مراکز بھی قائم کئے جائیں۔ ان امدادی مراکز میں تمام سہولیات مہیا کی جائےگی اور بچوں کے لیے دودھ اور بسکٹ وغیرہ بھی رکھا جائےگا۔
یہ بھی پڑھیں: سڑک حادثے میں بھائی بہن کی موت، 5 زخمی
انہوں نے کہا کہ آنگن واڑی کارکنان سے حاملہ خواتین کی فہرست بھی حاصل کی جا رہی ہے تاکہ انتظامیہ سیلابی صورتحال سے نمٹنے میں کامیاب ہو سکے اور علاقہ کی عوام کو پریشانیوں کا سامنا نہ کرنا پڑے۔
