بھارت بند کے دوران کرناٹک کے گلبرگہ میں کسان اور مختلف تنظیموں کی جانب سے مرکزی حکومت کے خلاف احتجاجی ریلی منظم کی گئی۔ گلبرگہ شہر میں کسان اور مختلف سماجی، ملی و سیاسی تنظیموں نے مل کر بھارت بند کی حمایت کی۔
اس موقع پر آل انڈیا خواتین تنظیم کی ریاستی سکریٹری ڈاکٹر کے نیلا نے کہا، مرکزی حکومت کسانوں کو نظر انداز کررہی ہے۔ کسان ملک کی ریڑھ کی ہڈی کی طرح ہیں۔ کسان اس ملک کے ان داتا ہیں۔ مگر مرکز کی بی جے پی حکومت کسانوں کے مسائل حل کرنے کے بجائے کسانوں پر مخالف زرعی قانون لاگو کرکے کسانوں کے لئے مشکلات پیدا کرنے کی کوشش کررہی ہے۔
یہ بھی پڑھیں:یادگیر: کسان حامی تنظیموں نے بھارت بند کال میں حصہ لیا
مرکز حکومت ملک میں صرف اڈانی، امبانی اور کارپوریٹ کمپنیوں کی ترقی کے لئے کام کررہی ہے۔ مودی حکومت کو کسان مزدور، غریبوں کی کوئی فکر نہیں ہے۔ ملک کے کسان پچھلے ایک سال سے کسان مخالف قانون کو واپس لینے کے لئے احتجاجی دھرنے پر ہیں۔ لیکن مودی حکومت اس قانون کو واپس لینے کی بات ہی نہیں کررہی ہے۔
آج ملک بھر میں زرعی قوانین کو واپس لینے کا مطالبہ کرتے ہوئے بھارت بند منایا گیا ہے۔ مختلف تنظیمیں کسانوں کی حمایت کررہی ہیں۔ پھر بھی مرکزی حکومت خاموش ہے۔ بہت جلد آنے والے دنوں میں بی جے پی کو عوام سبق سکھائیں گے۔
