بیدر : بھارت راشٹریہ سمیتی (بی آر ایس) کے لیڈر سید منصور احمد قادری بیدر نے میڈیا سے بات کرتے ہوئے کہا کہ ملک میں حق اور سچائی کا پرچم تھامنے والے لوگوں کو مختلف مسائل پیش آرہے ہیں مرکز میں برسراقتدار حکومت سرکاری ایجنسیوں کا غلط استعمال کرتے ہوئے حق کی آواز کو دبانے کی ناکام کوشش کررہی ہے۔ بھارتیہ جنتا پارٹی (بی جے پی) حکومت پر سید منصور احمد قادری نے سخت تنقید کرتے ہوئے کہا کہ ملک میں بی جے پی کے یہ سارے ہتھکنڈے صرف اور صرف اقتدار میں رہنے اور آنے والے عام انتخابات 2024میں دوبارہ اقتدار میں آنے کے لیے کیے جا رہے ہیں۔ انہوں نے کہا کہ تلنگانہ ،کرناٹک، مہاراشٹر، بہار، اتر پردیش ان ریاستوں کے علاوہ دہلی میں بھی مختلف پارٹیوں کے قائدین کو مرکزی ایجنسیوں کے تحت ہراساں کیا جا رہا ہے ۔
انہوں نے کہا کہ حق کی آواز کو جتنا دبایا جائے گا اتنا ہی ابھرے گی ملک کی کئی ریاستوں میں مرکزی حکومت خصوصاً بی جے پی اور برسر اقتدار حکومت والی ریاستوں میں عوام میں بی جے پی کی پالیسیوں کو لے کر کافی ناراضگی دیکھی جا رہی ہے۔ انہوں نے کہا کہ بی ایس آر پارٹی ملک کی مختلف ریاستوں میں علاقائی پارٹیوں کو جوڑ کر ملک کی سلامتی اور یکجہتی کے لیے پہل کر رہی ہے۔ یہ خوش آئندہ بات ہے کہ بی ایس آر پارٹی کے اس اقدام کی ریاست کے مختلف علاقائی پارٹیوں کے ذمہ داران استقبال کرتے ہوئے ایک جگہ جمع ہونے کی کوشش کر رہے ہیں۔
