کورونا وائرس کے پھیلاؤ کو روکنے کےلیے ملک بھر میں لاک ڈاون نافذ ہے جس کی وجہ سے غریب افراد خاص کر مہاجرین ورکرس کو کافی مشکلات پیش آرہی ہیں ایسے حالات میں مختلف تنظیمیں اور مخیر افراد کی جانب سے دل کھول کر مدد کی جارہی ہے اور یہ کوشش ہے کہ ان حالات میں کوئی بھوکا نہ رہے۔
بروہاٹ بنگلور مہانگر پالیکا کی اپیل کا اچھا اثر دیکھا گیا جبکہ کئی تنظیمیں اور انفرادی طور پر لوگوں کی جانب سے غریب عوام مںی کھانا تقسیم کیا جارہا ہے۔
مہانگر پالیکا کے مطابق اندرا کینٹین کی جانب سے روزانہ دو لاکھ سے زائد افراد کو کھانا مہیا کیا جارہا ہے جبکہ صرف جمعرات کو 2.85 لاکھ افراد کو ناشتہ، لنچ اور ڈنر فراہم کیا گیا۔
اس موقع پر جین انٹرنیشنل ٹریڈ آرگنائزیشن اور عظیم پریم جی فاونڈیشن سب سے زیادہ غریبوں کی مدد کےلیے آگے آیا ہے۔ جین انٹرنیشنل ٹریڈ آرگنائزیشن کی جانب سے 22 ہزار اور عظیم پریم جی فاونڈیشن کی جانب سے 20 ہزار غریبوں میں کھانا فراہم کیا جارہا ہے۔
اسی طرح شہر کی مختلف تنظیموں، این جی اوز کے علاوہ انفرادی طور پر کئی مخیر افراد غریبوں میں کھانا اور دیگر ضروری اشیا تقسیم کررہے ہیں۔
ملک بھر میں لاک ڈاون جاری ہے جبکہ ملک کے دیگر ریاستوں میں بھی غریب افراد کی بھرپور مدد کی جارہی ہے۔
