دنیا بھر میں آج سینئر سیٹیزن ڈے منایا جارہا ہے، اسی سلسلے میں کرناٹک میں گورنمنٹ جونیئر کالج یادگیر کے سبکدوش پرنسپل چندہ پاملپا پٹدار نے کہا کہ سرکاری ملازمت میں خدمت انجام دینے والے بزرگ شہریوں کو حکومت کی جانب سے پینشن برابر ملتا ہے مگر دیہاتوں میں رہنے والے بزرگ شہریوں کے لیے حکومت کی جانب سے بہت کچھ سہولتیں دینا باقی ہیں۔
انہوں نے ریاستی حکومت سے اپیل کرتے ہوئے کہا 'دیہاتوں میں رہنے والے 60 سال سے زائد عمر کے بزرگ شہریوں کے لیے حکومت کی جانب سے ہر حال میں پینشن ملنا چاہیے'۔
انہوں نے کہا کہ 'ٹرین اور بسوں میں بزرگ شہریوں کے لیے سیٹیں مختص کی گئی ہیں مگر کئی ایسی عوامی جگہیں ہیں جہاں پر بزرگ شہریوں کو پریشانیوں کا سامنا کرنا پڑتا ہے'۔
یہ بھی پڑھیے
شہنائی کے بے تاج بادشاہ، بسم اللہ خان کی برسی
حکومت کے ہی کئی ایسے محکمہ جات ہیں جہاں پر بزرگ شہریوں کو بھی لائن میں کھڑے رہنا پڑتا ہے، ایسی جگہوں پر بزرگ شہریوں کے لیے سہولتیں ہونی چاہئیں۔
انہوں نے کہا کہ 'ضعیف العمر شہریوں کے لیے ہر سال تہنیتی پروگرام ہوا کرتا تھا مگر کورونا وائرس کی وجہ سے اس سال ہم نے کوئی پروگرام منعقد نہیں کیا۔'
