ریاست کرناٹک کے ضلع یادگیر میں شہر کے سرکاری اردو وسطانیہ اسکول اسٹیشن بازار یادگیر میں ایک الوداعی تقریب کا انعقاد کیا گیا، جس کی صدارت محکمہ تعلیمات کے ڈپٹی ڈائرکٹر سرینواس ریڈی نے کی۔ محکمہ تعلیمات کے دیگر افسران، اردو و کنڑ اسکولز کے ذمہ داران نے بطور مہمان خصوصی کے شرکت کی۔
اس موقع پر محکمہ تعلیمات کے ڈپٹی ڈائریکٹر سرینواس ریڈی نے اپنے خطاب میں کہا کہ خدا کا شکر ہے کہ ہمیں سرکاری ملازمت ملی ہے اور ہمارے اوپر یہ ذمہ داری ہے کہ ہم اپنے پیشہ کے ساتھ انصاف کرتے ہوئے اپنی خدمات کو انجام دیں اور اسکول کے بچوں میں تعلیم کے ساتھ ساتھ اخلاق اور تربیت پر زیادہ توجہ دیں۔
انہوں نے کہا کہ ہمارے اسکول سے فارغ ہونے والا طالب علم جب کامیاب ہوکر سماج میں مختلف شعبوں میں اپنی خدمات انجام دیتا ہے اور وہ کبھی ملاقات کرکے یہ کہتا ہے کہ میں آپ کا شاگرد ہوں اور آج اس مقام پر ہوں تو ایک استاد کو اس وقت سب سے بڑی خوشی ہوتی ہے اور یہ وہ خوشی ہوتی ہے جس کی کوئی قیمت نہیں ہوتی۔
محترمہ صالحہ بیگم نے ای ٹی وی بھارت سے بات کرتے ہوئے کہا کہ میں محکمہ تعلیمات اور ان تمام اساتذہ کا شکریہ ادا کرتی ہوں کہ جنہوں نے ہر وقت میرا ساتھ دیا، انہوں نے کہا کہ میرا چودہ برس کا عرصہ اسی اسکول میں گزرا ہے، یہاں کے بچوں سے گزارش کرتی ہوں کہ وہ محنت اور لگن سے تعلیم حاصل کریں۔
اس موقع پر محکمہ تعلیمات کے ذمہ داران کے علاوہ مختلف اسکولز کے اساتذہ کے ساتھ ساتھ طلبہ و طالبات کی کثیر تعداد موجود تھی۔ اجلاس کی نظامت حفیظ پٹیل نے کی۔
