حضرت حیدر صفدر اولیاء سہروردی وہ غیر معمولی شخصیت ہیں جس نے حق کی تلاش میں تصوف کی راہ اختیار کی اور اس کے حصول کے بعد اسے فروغ کی خاطر اپنا تخت و تاج ترک کیا۔ حضرت صفدر اولیاء ایران سے تعلق رکھتے ہیں اور بنگلور کے قریب گاؤں ملباگل ان کی آرامگاہ ہے جو سبھی کے لیے ایک روحانی مرکز ہے۔
واضح رہے کہ حضرت صفدر اولیاء سہروردی ایران کے ایک علاقہ کے بادشاہ ہوا کرتے تھے اور انہوں نے حق کی تلاش اور اس کے فروغ کے لیے اپنی بادشاہت چھوڑ کر بھارت کے جنوبی ہند میں تبلیغ اسلام کے لیے آئے تھے۔
ہر برس کی طرح اس برس بھی حضرت صفدر اولیاء کا 767 واں عرس شریف نہایت جزبے اور عقیدت کے ساتھ منایا جا رہا ہے جس میں ملک سمیت پوری دنیا سے لاکھوں کی تعداد میں عقیدت مند شرکت کر رہے ہیں۔
حضرت صفدر اولیاء کی بارگاہ ایک تاریخی مقام ہے جو ہندو مسلم یکجہتی کا علمبردار ہے جہاں ہزاروں کی تعداد میں ہندو حضرات بھی اپنی مرادیں پوری کرنے حاضر ہوتے ہیں۔
کہا جاتا ہے کہ مشہور ٹی وی سیریل رامائن کا آخری حصہ ملباگل ہی میں تیار کیا گیا۔ عرس کے موقع پر کشتی کا دنگل اور قوالی کا مقابلہ جیسے مختلف پروگرام کا انعقاد کیا گیا۔
