کرگل ضلع میں انتظامیہ نے کورونا وائرس کے پھیلتے گراف کو دیکتھے ہوئے دفعہ 144 نافذ کرکے عوامی مقامات پر 5 سے زائد افراد کو جمع ہونے پر پابندی عائد کر دی ہے۔
حکم نامے کے مطابق انتظامیہ کی جانب سے جاری کردہ احکامات کی خلاف ورزی کرنے والوں کے خلاف سخت کاروائی کرنے کا انتباہ دیا گیا ہے۔
بتا دیں کہ لداخ میں کورونا وائرس نے دستک دے دی ہے اور یہاں 4 مثبت کیسز سامنے آئے ہیں۔
دو ہفتے قبل علی محمد نامی ایک شخص کی ہسپتال میں موت ہوگئی تھی اور خدشہ تھا کہ ان کی موت کورونا وائرس کی وجہ سے ہوئی ہے، تاہم ان کے سیمپلز کو جانچ کے لیے دہلی بھیجا گیا تھا، جہاں ان کی رپورٹ منفی آئی تھی۔
اس مہلک بیماری کی وجہ سے یہاں کے لوگوں میں اضطرابی کیفیت پیدا ہوگئی ہے۔
واضح رہے کہ چین کے ووہان شہر سے یہ وبا پھیلی اور دنیا کے تقریباً 130 ممالک اس وبا سے متاثر ہوگئے ہیں۔ اس بیماری کی وجہ سے سب سے زیادہ اموات چین میں ہوئی ہیں، جبکہ دوسرے نمبر پر اٹلی ہے جہاں 2158 افراد ہلاک ہوچکے ہیں۔
