رانچی: جھارکھنڈ کے وزیر اعلیٰ ہیمنت سورین کے آفس آف پرافٹ معاملے میں فیصلے پر پیدا ہونے والی الجھن کے درمیان، قانون ساز اسمبلی کے توسیعی مانسون اجلاس کی یک روزہ میٹنگ آج طلب کی گئی ہے۔Jharkhand political crisis
اسمبلی اسپیکر رابندر ناتھ مہتو نے کہا کہ انہیں قائد ایوان نے مطلع کیا ہے کہ ریاستی کابینہ ایوان میں اعتماد کا ووٹ حاصل کرنا چاہتی ہے۔ انہوں نے کہا کہ یہ کوئی خصوصی اجلاس نہیں ہے بلکہ 29 جولائی سے 5 اگست تک بلائے گئے مانسون اجلاس کے دوران ایوان کی کارروائی ایک دن پہلے غیر معینہ مدت کے لیے ملتوی کر دی گئی تھی۔
لہذا یہ مانسون سیشن کا توسیعی اجلاس ہے۔ انہوں نے بتایا کہ کن لوگوں کی وجہ سے یہ بھرم کی صورتحال پیدا ہوئی ہے کہ ہیمنت سورین حکومت مشکل میں ہے، یہ سب کو معلوم ہے۔ یہی وجہ ہے کہ حکومت ایوان میں اکثریتی تحریک پیش کرکے یہ پیغام دینا چاہتی ہے کہ اکثریت کس کے پاس ہے۔
اپوزیشن کے تمام اراکین کو یک روزہ توسیعی اجلاس کی اطلاع دے دی گئی ہے۔ اسپیکر نے کہا کہ کیش اسکینڈل میں گرفتاری کے بعد کولکتہ میں رہنے والے تینوں کانگریس ایم ایل ایز کو بھی اجلاس کی اطلاع دے دی گئی ہے۔ اب کون سے اراکین اجلاس میں شرکت کے لیے آتے ہیں یا نہیں، یہ انہیں فیصلہ لینا ہے۔
یو این آئی
