مرکزی وزیر داخلہ امت شاہ نے منگل کے روز کشمیری پنڈتوں کی ایک وفد کو یقین دلایا کہ حکومت کشمیر کے 10 اضلاع میں ان کے لیے الگ کالونی بنائے گی۔
معروف انگریزی نیوز چینل انڈیا ٹو ڈے کی جانب سے شائع ایک خبر کے مطابق امت شاہ نے وفد سے کہا کہ مرکزی حکومت نے وعدہ کیا ہے کہ پنڈتوں کے لیے کشمیر کے 10 اضلاع میں الگ کالونی بنائے گی اور عسکریت پسندوں کی جانب سے تباہ کیے گئے مندروں کو دوبارہ تعمیر اور مرمت کرے گی۔
انڈیا ٹو ڈے کے مطابق وفد میں اتل کول، کرنل تاج ٹکو ، ڈاکٹر سریندر کول، سنجے گنجو اور پارکیشت کول شامل تھے۔ انہوں نے آج امت شاہ سے ملاقات کی۔
کشمیری پنڈتوں نے اپنی ملاقات کے دوران وزیر داخلہ سے اپیل کی کہ وہ بے گھر پنڈتوں کے مسائل کو ترجیحی بنیادوں پر حل کریں۔
پنڈتوں نے امیت شاہ پر زور دیا کہ وہ وادی کشمیر میں برادری کی عزت اور وقار واپسی کے لیے ٹھوس اقدامات کریں۔
