عالمی وبا کورونا وائرس کے پھیلاؤ کو روکنے کے لیے عائد لاک ڈاؤن کے دوران تقریباً دو ماہ تک دیگر دکانوں کے ساتھ ساتھ شراب کی دکانیں بھی بند رہیں۔ تاہم یکم جون سے لاک ڈاؤن میں نرمی کے اعلان کے ساتھ ہی بدھ کو جموں میں شراب کی دکانوں کے باہر لوگوں کی لمبی قطاریں لگ گئیں۔
بدھ کو جموں کے چند علاقوں میں شراب کی دکانوں کو کھولنے کا اجازت دی گئی۔ اس اعلان کے بعد صبح سے ہی جموں کے نروال، بی سی روڈ، ریزیڈنسی روڈ میں واقع شراب کی دکانوں کے باہر لوگوں کا کافی رش لگا رہا۔
لوگوں کی تعداد اس قدر زیادہ تھی کہ لوگوں میں افراتفری پھیل گئی جسے کنٹرول کرنے کے لیے پولیس و سی آر پی ایف کی بھاری نفری کی تعیناتی عمل میں لائی گئی۔
شراب دوکانوں کے مالکان نے پہلے ہی سماجی دوری برقرار رکھنے کے لیے دکانوں کے آگے چاک سے دائرے بنا دیے تھے لیکن خریداروں کی بھیڑ اتنی زیادہ تھی کہ سماجی دوری برقرار رکھے جانے کے اعلان کو خاطر میں نہیں لایا گیا۔
