کشمیری پنڈت مہاجرین نے اپنے مطالبات کے حق میں جگتی مائیگرنٹ ٹاؤن شپ کمیٹی کے صدر شادی لعل پنڈتا کی قیادت میں جموں پریس کلب میں احتجاج کیا۔ ای ٹی وی بھارت کے ساتھ بات کرتے ہوئے شادی لعل پنڈتا نے کہا کہ حکومت نے مہاجر کشمیری پنڈتوں کے مسائل کو پس پشت ڈال دیا ہے۔
انہوں نے کہا کہ تین سال قبل ماہانہ ریلیف کو فی کنبہ زیادہ سے زیادہ تیرہ ہزار روپے تک بڑھایا گیا تھا لیکن گذشتہ برسوں میں مہنگائی بڑھ جانے کے باوجود اس میں کوئی اضافہ نہیں کیا گیا۔
انہوں نے کہا کہ سرکار کو تعلیم یافتہ کشمیری پنڈت مہاجرین کے لیے کم از کم 20 ہزار نوکریاں فراہم کرنی چاہیے۔ احتجاج میں شامل کشمیری مہاجر راج کمار تکو نے کہا کہ سرکار کو چاہیے کہ وہ ایسے دسویں پاس بے روزگار نوجوانوں کو درجہ چہارم کی پانچ ہزار نوکریاں فراہم کرے جو غریبی کی وجہ سے اپنی تعلیم کو آگے بڑھانے سے قاصر رہے۔
مزید پڑھیں: آرٹیکل 370 کی منسوخی کے بعد جموں وکشمیر میں دو افراد نے زمین خریدی
انہوں نے ایل جی انتظامیہ سے اپیل کی کہ وہ کشمیری پنڈت مائیگرنٹ نوجوانوں کی پولیس میں بھرتی کے لئے خصوصی بھرتی مہم منعقد کرے تاکہ جگتی اور دیگر مائیگرنٹ کالونیوں میں عارضی طور پر رہائیش پذیر تعلیم یافتہ بے روزگارنوجوانوں کو روزگارکے مواقع فراہم ہوسکیں۔
