لیفٹیننٹ گورنر منوج سنہا نے آج جموں سول سکریٹریٹ میں جموں و کشمیر کے اینٹی کرپشن بیورو کے موبائل ایپلیکیشن 'ستارک ناگرک' اور ڈیپارٹمنٹل ویجیلینس آفیسرز پورٹل کا آغاز کیا۔
اس موقع پر خطاب کرتے ہوئے لیفٹیننٹ گورنر نے کہا کہ حکومت شفاف اور جوابدہ حکمرانی کو یقینی بنانے کے لئے جامع اقدامات کررہی ہے۔ اس سمت میں ایک اور قدم اٹھاتے ہوئے آج شروع کی جانے والی اس موبائل ایپلی کیشن کو اس مقصد کے ساتھ تیار کیا گیا ہے تاکہ بدعنوانی کو روکا جائے اور شہری آسانی سے اپنی شکایات درج کر سکیں۔
اینڈروئیڈ موبائل کا استعمال کرنے والا کوئی بھی شہری پلے اسٹور سے یہ ایپ ڈاؤن لوڈ کرسکتا ہے۔ شکایت کے اندراج کے وقت ایک منفرد شناختی نمبر الاٹ کیا جائے گا جو بعد میں شکایت سے متعلق مزید معلومات حاصل کرنے (ٹریک) کے لئے استعمال کیا جاسکتا ہے۔
لیفٹیننٹ گورنر نے کہا کہ انفارمیشن ٹکنالوجی کے موثر استعمال سے ہمیں موثر، شفاف اور جوابدہ نظام تشکیل دینے میں مدد ملے گی۔
پروگرام کے دوران لیفٹیننٹ گورنر نے افسران کو ہدایت کی کہ وہ زیر التواء عدالتی معاملات کا ٹریک دیکھنے کے لئے اسی طرح کا کوئی طریقہ کار بنائیں۔
