لیفٹیننٹ گورنر منوج سنہا کی سربراہی میں اینڈمنسٹریٹیو کونسل (اے سی) نے جموں میں شعبہ سیاحت کو فروغ دینے کے لیے تیروملا تروپتی دیوستھنم (ٹی ٹی ڈی) کو مندر، پاٹشالہ، روحانی/مراقبہ مرکز، دفتر، رہائشی کوارٹر اور پارکنگ کی تعمیر کے لیے 496 کنال 17 مرلہ ارضی کو مختص کرنے کی تجویز کو منظوری دے دی۔
ارضی کو 40 سال کی لیز پر فراہم کیا گیا ہے جس میں مستقبل میں میڈیکل اور تعلیمی سہولیات بھی میسر ہوں گی۔
تیروملا تروپتی دیوستھنم بین الاقوامی شہرت یافتہ ایک فلاحی ادارہ ہے جسے حکومت نے ٹی ٹی ڈی ایکٹ، 1932 کے تحت قائم کیا ہے۔ اس ادارے میں روحانی، ثقافتی، معاشرتی اور تعلیمی شعبے کی سرگرمیاں انجام دی جاتی ہیں۔
اس ادارے کی آمد سے جموں و کشمیر میں اقتصادی سرگرمیوں کو فروغ حاصل ہونے کے علاوہ مندروں کے شہر جموں میں عقیدت مندوں کی آمد سے سیاحت کو تقویت حاصل ہوگی۔
تکمیل کے بعد ٹی ٹی ڈی انفراسٹرکچر ماتا وشنو دیوی اور امرناتھ جی یاترا کے عقیدت مندوں کے علاوہ سیاحوں کی کشش اور دلچسپی کا مرکز ہوگا۔ اس سے سیاحوں کو جموں شہر آنے اور یہاں زیادہ دیر تک قیام کرنے کی سہولت ملے گی۔
مستقبل میں کیمپس میں مزید وسعت خطے کی معاشی ترقی میں بھی مددگار ثابت ہوگی۔
