جموں وکشمیر اسٹیٹ الیکشن کمشنر کے کے شرما نے ای ٹی وی بھارت کے ساتھ خصوصی بات چیت میں کہا کہ جموں و کشمیر میں لوگوں نے ڈسٹرکٹ ڈیولپمنٹ کونسل کے انتخابات میں بڑھ چڑھ کر حصہ لیا۔ خاص کر وادی کشمیر میں بھی لوگ اپنے گھروں سے باہر نکلے اور اپنے جمہوری حقوق ادا کیے یہ کافی خوش آئند رہا۔ انہوں نے باتوں ہی باتوں میں کہا کہ لیفٹننٹ گورنر کے حکم پر جلد ہی ریاست میں 4جی انٹرنیٹ خدمات بحال ہوں گے ایسی خبریں ان تک پہنچی ہیں۔
انہوں نے بتایا کہ جموں وکشمیر میں پرامن طور پر ڈی ڈی سی انتخابات منعقد کرائے گئے اور پرامن طور پر ووٹوں کی گنتی بھی اختتام پذیر ہوئی۔ انہوں نے کہا کہ 30 فیصد سے زائد ووٹنگ کشمیر صوبہ میں ہوئی جو کہ نہایت ہی حوصلہ افزا اور خوش آئند ہے۔ لوگ گھروں سے باہر نکلے اور جمہوریت کا جشن منایا۔
ووٹوں کی گنتی کے دن انٹرنیٹ خدمات بند کرنے سے متعلق پوچھے گئے ایک سوال کے جواب میں انہوں نے کہا کہ کچھ لوگ جموں و کشمیر میں امن و امان میں خلل ڈالنے کی کوشش کر رہے تھے۔ ان شرپسندوں کی تعداد کم ہے لیکن امن و امان کی صورتحال کو برقرار رکھنے کے لئے ایسا قدم اٹھانا پڑا۔
یہ بھی پڑھیں: 'مرکزی حکومت ہم سے سیاسی سطح پر مقابلہ کرے، ایجنسیوں کے ذریعہ نہیں'
کے کے شرما نے مزید کہا کہ کشمیر میں امیدواروں کے تحفظ کے لئے چند مقامات پر پابندیاں عائد کرنی پڑیں اور جیت کے بعد جشن منانے کی اجازت نہیں دی گئی۔ کبھی کبھی ایسے فیصلے لینے پڑتے ہیں۔ عوام اسے سمجھتی ہے اور انتظامیہ کے ساتھ پورا تعاون بھی کرتی ہے۔
