پیپلز ڈیموکریٹک پارٹی جنرل سیکریٹری سریندر چودھری نے کہا ہے کہ پی ڈی پی 'ترنگے کی سیاست' پر یقین نہیں رکھتی ہے بلکہ پارٹی ہمیشہ عوامی مسائل کو اُجاگر کرنے میں یقین رکھتی ہے۔
پی ڈی پی صدر محبوبہ مفتی کے دورہ جموں کی تفصیل دیتے ہوئے سریندر چودھری نے کہا کہ محبوبہ مفتی سے عوامی وفود ملاقات کریں گے۔ انہوں نے کہا 'حکومت دعویٰ کر رہی ہے کہ جموں و کشمیر کی خصوصی حیثیت ختم کرنے اور ریاست کو دو مرکزی علاقوں میں منقسم کرنے سے لوگ خوش ہیں۔ محبوبہ مفتی عوامی وفود سے ملاقات کر کے اس کی حقیقت بھی دریافت کریں گی۔'
جموں میں پی ڈی پی دفتر پر شدت پسند نظریات رکھنے والی تنظیموں کی جانب سے ترنگا لہرانے پر سریندر چودھری نے کہا کہ 'بھارت ایک جمہوری ملک ہے اور ان سب چیزوں سے انہیں کوئی فرق نہیں پڑتا۔'
انہوں نے کہا 'پی ڈی پی کے بانی مرحوم مفتی محمد سعید نے جموں و کشمیر میں ترنگا لہرایا اور وہ بھارتی ہونے پر ناز کرتے تھے۔'
سریندر چودھری نے کہا کہ 'حکومت قومی پرچم کی آڑ میں اصل مسائل سے لوگوں کی توجہ ہٹانے میں مصروف ہے'۔
یہ بھی پڑھیں: گپکار اعلامیہ: محبوبہ مفتی آج جموں پہنچیں گی
غور طلب ہے کہ محبوبہ مفتی کی رہائی کے بعد یہ ان کا جموں کا پہلا دورہ ہے۔
جموں میں محبوبہ مفتی کی آمد پر سکیورٹی سخت کر دی گئی ہے۔ادھر دورے سے قبل پارٹی کے دفتر میں سابق وزیر اعلیٰ کے نئے بینرس اور پوسٹرس بھی لگائے ہیں۔ بی جے پی اور اس کی ہم خیال پارٹیوں نے پہلے ہی گپکار اعلامیہ کی مخالفت کی ہے۔ بی جے پی کے ریاستی صدر رویندر رینہ نے حال ہی میں گپکار اعلامیے میں شامل جماعتوں کو ملک دشمن قرار دیا تھا۔
