وسطی کشمیر کے ضلع گاندربل میں محکمہ جل شکتی میں تعینات عارضی ملازم کا ایک ویڈیو سوشل میڈیا پر وائرل ہوا ہے۔ اس وائرل ویڈیو میں عارضی ملازم نے محکمہ جل شکتی پر ہراساں کرنے کا الزام عائد کیا ہے۔
ان کا کہنا ہے کہ انہوں نے محکمے سے پانچ ماہ کی تنخواہ کا مطالبہ کیا تھا جس کے بعد انہیں اسے دور افتادہ علاقہ رنگل ماسٹر پلان کے دروازے پر تعینات کردیا گیا ہے، جہاں کڑاکے کی سردی اور برفباری میں وہ بے یار و مدد گار، بھوکے پیاسے اور بغیر کسی گرمی کے بندوبست کے کپکپاتے ہوئے اپنی ڈیوٹی انجام دے رہے ہیں۔
انہوں نے کہا محکمہ جل شکتی میں تعینات اعلیٰ عہدوں پر فائز افسران اور اعلیٰ حکام ہزاروں اور لاکھوں روپے تنخواہ اور دیگر مراعات حاصل کرکے گھروں میں آرام سے بیٹھے ہیں۔ وہیں انہیں حق کی آواز بلند کرنے کی سزا ملی ہے۔
اس سلسلہ میں جب ہمارے نمائندے نے ڈی سی گاندربل شفقت اقبال سے فون پر رابطہ کیا تو انہوں نے اس معاملے سے لاعلمی کا مظاہرہ کیا۔ انہوں نے کہا انہیں اس سلسلہ میں کوئی اطلاع نہیں ہے، تاہم انہوں نے کہا کہ ویڈیو دیکھنے کے بعد وہ اس سلسلہ میں کوئی بیان جاری کریں گے۔
