ترال: دور افتادہ گاؤں میں رابطہ سڑک نہ ہونے سے عوام پریشان

سب ضلع ترال کے ایک دور افتادہ گاؤں زاجہ کھوڑ میں رابطہ سڑک کی عدم دستیابی سے عوام پریشان تو ہے ہی معصوم طلباء کو بھی دقتوں کا سامنا کرنا پڑ رہا ہے تاہم حکام کی جانب سے اس جانب غفلت برتنے سے عوام سراپا احتجاج ہے۔

تفصیلات کے مطابق زاجہ کھوڑ نامی گاؤں میں مقامی اسکول تک رابطہ سڑک کی عدم دستیابی سے عوام پریشان ہے وہیں اسکول میں زیر تعلیم طلباء کو بھی کافی دقتوں کا سامنا کرنا پڑ رہا ہے۔

مقامی لوگوں کے مطابق اس رابطہ سڑک کی تعمیر وتجدید کے لیے انہوں نے دیہی ترقی محکمے کو کئی مرتبہ گزارش کی گئی لیکن ہر بار انکی صدا، صدا بہ صحرا ثابت ہوئی۔

مقامی طالب علم ریاض احمد نے ای ٹی وی بھارت کو بتایا کہ سڑک نہ ہونے سے انکو زبردست مشکلات درپیش ہیں اور بارش پڑنے کے بعد تو ان کا اسکول جانا محال بن جاتا ہے۔

ایک مقامی شہری عبدالرحمان نے بتایا کہ اس سڑک کے نہ ہونے سے جہاں مقامی آبادی کو سخت مشکلات کا سامنا ہے وہیں طلباء پر بھی اسکی مار پڑ رہی ہے کیونکہ موسم خراب ہونے کے ساتھ ہی وہ اسکول نہیں جا سکتے۔


زاجہ کھوڑ کی آبادی کا حکومت سے مطالبہ ہے کہ گاؤں میں رابطہ سڑک کی تعمیر و تجدید کا عمل ہنگامی بنیادوں پر شروع کیا جائے تاکہ ان کے مسائل جلد از جلد حل کیے جائے۔