ایودھیا میں بننے والی مسجد پر نہیں لگے گا ٹیکس

بابری مسجد اور رام جنم بھومی پر سپریم کورٹ کے فیصلے کے بعد ایودھیا میں بننے والی مسجد کے لئے ہونے والے عطیہ پر ٹیکس نہیں لگے گا۔ مسجد تعمیر ٹرسٹ کے سکریٹری نے ای ٹی وی بھارت کو بتایا کہ ان کو اس بارے میں آن لائن جانکاری ملی ہے۔

اتر پردیش کے دھنی پور میں پانچ ایکڑ میں بننے والی مسجد کے لئے ملنے والے عطیہ پر ٹیکس نہیں لگے گا۔ مرکزی سرکار نے ٹیکس پر چھوٹ دینے پر مہر لگا دی ہے۔ مسجد تعمیر ٹرسٹ کے سکریٹری نے ای ٹی وی بھارت کو بتایا کہ ان کو اس بارے میں آن لائن جانکاری ملی ہے۔

انڈو اسلامک کلچر فاؤنڈیشن کے ترجمان اطہر حسین نے ای ٹی وی بھارت سے کہا کہ بغیر کسی اپیل کے آن لائن پورٹل کے ذریعے سے اب تک ٹرسٹ کو مسجد بنانے کے لئے 20 لاکھ سے زیادہ روپیے موصول ہوچکے ہیں۔ لمبے وقت سے انکم ٹیکس کی دفعہ 80 (جی) کے تحت چھوٹ کے لئے درخواست دینے کے بعد جمعہ کو یہ اطلاع ملی کہ مسجد تعمیر پر ملنے والے روپیے پر ٹیکس نہیں لگے گا۔

ٹیکس سے چھوٹ ملنے پر ٹرسٹ کے ذمہ داران کو اب بڑے پیمانے پر مسجد کی تعمیر کے لئے عطیہ ملنے کی امید ہے۔ ٹرسٹ کے رکن اور ایودھیا کے رہنے والے کیپٹن افضال کا کہنا ہے کہ اس کی وجہ سے کام رُکا ہوا تھا، جس کے لئے مرکزی سرکار اور وزارت خزانہ سے اس میں دخل کی گزارش کی گئی تھی۔