شمالی کشمیر کے ضلع بانڈی پورہ کے لائن ااف کنٹرول پر آج صبح بھارت وپاکستانی فوج کے درمیان گولیوں کا تبادلہ ہوا۔ تاہم اس میں کسی کے ہلاک ہونے کی اطلاع نہیں ہے۔
پولیس ذرائع نے بتایا کہ گریز کے بگٹورعلاقے میں تاربل گاؤں کے نزدیک بھارت کے درمت پوسٹ اور پاکستان کے لوسار پوسٹ سے جمعہ کی صبح قریب سوا گیارہ بجے گولہ باری شروع ہوئی۔ انہوں نے کہا کہ ماہ رواں کے دوران طرفین کے درمیان گولہ باری کے تبادلے کا یہ چوتھا واقعہ ہے۔
پولیس اور فوج نے اسی علاقے میں 14 ستمبر کو جنگجوؤں کی طرف سے در اندازی کی ایک کوشش کو ناکام بنا کر اسلحہ و گولہ بارود برآمد کرنے کا دعویٰ کیا تھا۔
قبل ازیں اسی علاقے سے دو عسکریت ہسندوں کی لاشیں، جو ایک دریا میں ڈوب گئی تھیں، برآمد کی گئی تھیں۔
قابل ذکر ہے جموں وکشمیر میں سرحدوں پر ہندوستان اور پاکستان کی فوج کے درمیان گولہ باری کے تبادلے کا سلسلہ تھمنے کا نام ہی نہیں لے رہا ہے۔
سال 2003 میں دونوں ممالک کے درمیان ایک جنگ بندی معاہدہ طے پانے اور سال رواں کے آغاز سے دنیا بھر میں پھیلنے والے وبا کے باوجود بھی طرفین آئے روز ایک دوسرے کے ٹھکانوں کو نشانہ بنا کر سرحدی لوگوں کی زندگیوں کو مزید اجیرن بنا رہے ہیں۔
