بھاری برفباری کی وجہ اس وقت وادیء کشمیر کے لوگوں کو گونا گوں مشکلات کا سامنا ہے۔ ایک جانب کئی علاقوں میں تاحال بجلی کی سپلائی متاثر ہے وہیں، کئی علاقوں میں پینے کے پانی کی عدم دستیابی سے بھی لوگ پریشان ہیں۔
دوسری جانب اہم رابطہ شاہراہوں کو چھوڑ کر دیگر رابطہ اور اندورنی سڑکوں پر سے برف نہ ہٹائے جانے سے لوگوں کا چلنا پھرنا محال بن چکا ہے اور اس پر ستم ظریفی یہ کہ سڑکوں کے زیر آب آنے سے دشواریوں میں مزید اضافہ ہورہا ہے۔
ای ٹی وی بھارت کے نمائندے نے شہر سرینگر کے کئی علاقوں کا دورہ کر کے لوگوں کی مشکلات جانے کی کوشش کی۔
دارالحکومت سرینگر سمیت دیگر علاقوں کی سڑکوں پر جمع پانی جھیل کا منظر پیش کر رہا ہے۔ اس صورتحال کے سامنے انتظامیہ کے دعوے سراب ہی ثابت ہورہے ہیں۔
ادھر جواہر نگر، بمنہ، بٹہ مالو، نٹی پورہ اور مہجور نگر کے علاوہ راجباغ ،مگھر مل باغ، بٹوارہ، سونوار اور دیگر علاقوں کی اندورنی رابطہ سڑکوں پر برف کا پانی جمع ہونے سے راہگیروں کو چلنے میں دقتوں کا سامنا ہے۔
لوگوں کا کہنا ہے کہ انتظامیہ سرینگر شہر کو سمارٹ سٹی بنا نے کے دعوے تو کررہی ہے لیکن معمولی بارش اور برفباری کے باعث ڈرینج سسٹم کے ناکارہ ہو جانے سے وہ دعوے زمینی سطح پر سراب ثابت ہورہے ہیں۔
ادھر شہر خاص کے معروف بازاروں کے علاوہ خانیار، بابہ ڈیم، حول اور صورہ وغیرہ کی اندرونی سڑکوں پر سے ابھی بھی برف نہیں ہٹائی گئی۔ جس کے باعث گاڑیوں کی آمد و رفت تو کیا، پیدل چلنا بھی دشوار ہو گیا ہے۔ جبکہ مریضوں کو اہسپتال پہنچنے میں بھی کافی دقت کا سامنا کرنا پڑرہا ہے۔
خیال رہے سرینگر میں سال 2007 کے بعد چلہ کلان میں ہونے والی یہ سب سے بھاری برفباری ہے۔ اس دوران شاہراہوں، سڑکوں اور گلی کوچوں سے برف ہٹانے کی انتظامیہ کی کوششیں ناکام ثابت ہو رہی ہیں۔
