اساتذہ کی کوئی پوسٹ زیر التواء نہیں: جے کے ایس ایس بی

جموں و کشمیر سروسز سلیکشن بورڈ نے کہا ہے کہ 'اس وقت بوڑد میں اساتذہ کی کوئی بھی اسامی زیر التوا نہیں ہے اور نہ ہی اسکول ایجوکیشن کی جانب سے اساتذہ کی اسامیوں یا اس سے منسلک کسی دوسرے عہدے کے لئے بوڑد کو کوئی بھی انڈنٹ موصول ہوئی ہے۔'

بورڈ نے ان خبروں کی تردید کی ہے جس میں کہا گیا تھا کہ محکمہ اسکول ایجوکیشن نے سال 2017 میں 2154 اسامیوں کو پُر کرنے کی خاطر بورڈ کو انڈنٹ بھیجی تھی۔ اس میں 14 اضلاع کے لئے جنرل لائن ٹیچر، سائنس، اردو اور ریاضی اساتذہ کی اسامیاں شامل ہیں۔

ایس ایس بی نے اپنی وضاحت میں مزید کہا کہ 'بورڈ نے ان اسامیوں کو نوٹس نمبر 06،2017 (آئٹم نمبر1-142) کے تحت شائع کیا تھا۔ بعد میں اہل امیدواروں کے امتحانات منعقد کر کے 2154 اسامیوں کے لئے منتخب ہوئے امیداروں کی حتمی فہرست بھی باضابطہ طور ایس ایس بی کی ویب سائٹ پر شائع کی تھی۔ پھر آخری مرحلے کی تکمیل کے بعد مارچ 2019 کے مہینے میں محکمہ اسکول تعلیم کو ارسال بھی کر دی گئی تھی۔'

جموں و کشمیر ایس ایس بی نے آگاہ کیا ہے کہ 'اساتذہ کی اسامیوں کو پُر کرنے کے لئے محکمہ اسکول ایجوکیشن کی جانب سے بورڈ کو کوئی نیا انڈنٹ موصول نہیں ہوا ہے اور نہ ہی بورڈ میں اساتذہ کی کوئی اسامی زیر التواء ہے۔'