موہن بگان نے گزشتہ برس کی تاریخ کو دوہراتے ہوئے ریئل کشمیر فٹبال ٹیم کو اس کے گھریلو میدان میں شکست دے دی۔
چلہ کلان کی شدید سردی میں ٹی آر سی گراؤنڈ میں میچ کے روز صبح سے ہی ہزاروں شائقین کشمیر کے مختلف علاقوں سے رئیل کشمیر ٹیم کی حمایت میں پہنچ گئے تھے، تاہم اپنی ٹیم کی شکست پر انہیں مایوسی کا سامنا کرنا پڑا۔
میچ کے دوران شائقین میں زبردست جوش دیکھا گیا اور وہ اپنی ٹیم اور پسندیدہ کھلاڑی کی حوصلہ افزائی کرتے ہوئے نظر آئے۔
ای ٹی وی بھارت سے بات کرتے ہوئے شائقین نے کہا کہ 'انہوں نے میچ کا لطف اٹھایا اور سخت سردی کے باوجود بھی وہ میچ دیکھنے کے لیے یہاں آئے۔
انہوں نے کہا کہ 'اگرچہ ان کی ٹیم شکست سے دو چار ہوگئی لیکن انہوں نے میچ کا بھرپور لطف اٹھایا۔
اس دلچسپ میچ کے دوران دونوں ٹیموں نے شاندار کھیل کا مظاہرہ کیا اور شائقین کی امیدوں پر کھرے اترے تاہم ریئل کشمیر کی شکست ہوئی۔
میچ کا پہلا ہاف بغیر کسی گول کے مکمل ہوا جبکہ دوسرے ہاف میں موہن بگان نے دو گول کر کے ریئل کشمیر پر سبقت حاصل کی جو آخر تک برقرار رہی۔
موہن بگان کی طرف سے اسپین کے کھلاڑی جوزبہ بیتیا اور نوندمبا نورم نے گول کئے۔
حالاںکہ ریئل کشمیر کو میچ کے دوران تین بار گول کرنے کا موقع ملا لیکن گول کرنے میں ناکام ثابت ہوئے۔
واضع رہے کہ ہیرو آئی لیگ میں ریئل کشمیر کا یہ چوتھا میچ تھا، اس ٹیم نے ایک میچ میں فتح حاصل کی ہے اور دو میچ ڈرا ہوئے۔
ریئل کشمیر کو ٹی آر سی ہوم گراؤنڈ میں 10 میچ کھیلنے ہیں جبکہ لیگ کے دیگر 10 میچ انہیں کشمیر سے باہر کھیلنے ہیں۔
