جموں وکشمیر انتظامیہ کے ہوم ڈیپارٹمنٹ کی جانب سے ایک حکم نامہ جاری کیا گیا جس میں یہ واضح کیا ہے کہ جموں کشمیر میں فی الحال 2 جی انٹرنیٹ خدمات کو معمولا ایسے ہی جاری رکھا جائے گا اور 8 جولائی تک4 جی انٹرنیٹ خدمات پر عائد پابندی برقرار رکھنے کا فیصلہ کیا گیا ہے۔
واضح رہے کہ مرکزی علاقے میں گزشتہ سال 5 اگست کے بعد سے سے مسلسل 4 جی انٹرنیٹ سروس معطل ہے۔
حکم نامے میں کہا گیا ہے کہ ' انٹرنیٹ خدمات کے ضوابط کو باقاعدہ وقفوں سے وقتا فوقتا جاری کیا گیا ہے اور مناسب اتھارٹی کے ذریعہ جائزہ لیا گیا ہے تاکہ یہ یقینی بنایا جاسکے کہ یہ ہدایات دوسری ضروریات کو پورا کرنے کے علاوہ کم سے کم پابند ہیں اور تناسب کے اصول کو مطمئن کرتی ہیں ۔'
اس میں کہا گیا ہے کہ 'میک بائنڈنگ کے ساتھ انٹرنیٹ کنیکٹیویٹی دستیاب ہے اور ملک دشمن عناصر کی جانب سے افواہوں اور فرضی خبروں کو روکنے کے لیے تیز رفتار موبائل انٹرنیٹ پر پابندیاں عائد کردی گئیں ہیں ، تاکہ اشتعال انگیزی کی اپ لوڈنگ / ڈاؤن لوڈ / گردش کو روکا جاسکے۔
حکم نامے کے مطابق انٹرنیٹ تک رسائی پر پابندی بتدریج کم کردی گئی ہے جیسے کہ جیسے کسی بھی رکاوٹ کے بغیر سوشل میڈیا استعمال کیا جارہا ہے اور اس کے ساتھ ساتھ ویب سائٹز کی وائٹ لسٹنگ وغیرہ بھی ہٹا دی گئی ہے۔
قابل ذکر ہے کہ اس سے قبل سپریم کورٹ میں بھی جموں و کشمیر میں 4جی انٹرنیٹ کی بحالی کو لیکر معاملہ زیر بحث لایا گیا اور سپریم کورٹ نے مرکزی حکومت کو اس سلسلے میں ایک خصوصی ٹیم تشکیل دے کر حالات کا جائزہ لینے کی ہدایات دی تھیں۔
اس سے قبل بھی اس حوالے سے عدالت عالیہ نے مرکزی حکومت کی نوٹس میں یہ بات لائی جس میں انٹرنیٹ پر پابندی سے جموں وکشمیر میں پیدہ شدہ صورتحال کا جائزہ لینے کی صلاح دی گئی تاہم ملکی سالمیت اور قومی سلامتی کا حوالہ دے کر 4 انٹرنیٹ پر پابندی میں مسلسل توسیع کی گئی۔
